OLMMP nagpahigayon og Binyagan ng Parokya

Usa sa highlights sa pagsaulog sa ikanapulo ka tuig nga kapistahan sa parokya sa Miraculous Medal sa Indangan karong Nobyembre 27, 2019 mao ang “Binyagan ng Parokya.” Gipahigayon kini niadtong Nobyembre 16, 2019 sa alas nuebe sa buntag didto sa St. Joseph the Worker GKK Chapel, Molave Homes, Indangan.

Adunay 105 ka mga bata ang nakadawat sa Sakramento sa Bunyag. Kini ang pinakaunang higayon nga Binyagan nga gihimo sa parokya. Sukad sa pagtukod niining parokyaha karon pa nahitabo nga ingon ani ka daghan ang nagpabunyag. Tungod kay ang Binyagan gipahigayon nga libre o walay Arancel. Busa ang mga magtiayon nga adunay mga anak nga wala pa kabunyagi sa walay duhaduha mitubag ug miapil sa maong programa. Kasagaran sa ginikanan adunay duha hangtod sa upat ka bata ang gipabunyagan.

Matud pa sa usa ka ginikanan, usa kini ka dakong oportunidad o tabang alang kanila aron mabunyagan ang ilang mga kabataan, ilabi niadtong mga bata nga mitungha na sa elementarya ug wala pa kabunyagi. Dako ang pasalamat sa mga ginikanan sa kura paroko nga si Fr. Jess Samaniego tungod sa paghimo niining maong kalihukan.

Sa wala pa ang Binyagan gipahitabo adunay pre-baptism seminar nga gihatag alang sa mga ginikanan ug sa mga sponsor sa mga kabataan nga bunyaganan. Tungod sa kadaghan sa magpabunyag gibahin ang paghatag sa maong seminar sa upat ka GKK diin upat usab ka grupo sa Katekista ang mihatag sa katekesis mahitungod sa Sakramento sa Bunyag.

Ang maong Binyagan gisugdan sa usa ka Santos nga Misa ug human sa homiliya ni Fr. Jess iyang gisunod ang Rito sa Sakramento sa Bunyag. Dako ang pasalamat sa PSP Ministry Coordinator nga si Sis. Edith Mejos tungod sa pagtinabangay sa mga kaubanang katekista nga nagmalampuson ang Binyagan. Nagpasalamat usab siya sa mga PSK sa matag GKK nga maoy mitabang aron mapaabot sa myembro ang maong panawagan. Malipayon usab ang kura bisan pa man sa kainit sa panahon niadtong higayona tungod sa positibong tubag sa mga ginikanan aron nga ang ilang mga anak mabunyagan. (Anabelle Ejercito Encluna | OLMMP Parish Soccom)