Sa GKK nidaghan ang bokasyon

(Pakighinabi uban kang Most Rev. Medil Aseo, D.D., Obispo sa Tagum)

Tinuod na nga ang BEC, Basic Ecclesial Communities, sa Inengles man na nuh, pero sa binisaya, GKK, Gagmay’ng Kristohanong Katilingban nagsugod sa Diocese sa Tagum 50 anyos na ang milabay. Mao na nga bag-o ra gani mi naghatag og pasidungog sa ika-50 sa GKK, Gagmay’ng Kristohanong Katilingban.

Ang sinugdanan gyud ana, ako, una sa tanan, maingon gyud nako nga ako bunga pud ko sa GKK kay ang GKK mga 1968 na siya nagsugod pinaagi sa mga misyonerong pari nga Maryknoll nga pinagulohan sa una ni Bishop Joseph Reagan. Ingnon ko lang nga ako nakasaksi ko kay sa 1963 ngadto sa 68, elementary ko ana, unya sakristan ko, unya sa dihang nag-high school ko 67 hangtod sa 71 ni graduate ko og high school, unya pagkahuman college diha sa St. Francis Xavier.

During these times nga ang GKK gi-promote sa mga paring Maryknoll, mga Amerikano pa man to, usahay mobakasyon mi, ako katong college nako sa seminaryo, isip seminarian, nahinumdom ko nga gikan sa akong pagka-sakristan, college na man, mouban-uban ko sa among kura paroko nga Amerikano. Unya didto sa mga GKK, nga niadtong panahona nga gisugdan pa, naa pa ang formation, nakauban-uban gyud ko. Usahay gani makaapil-apil pud ko og lecture labina sa parte ba sa pagpalig-on sa mga membership.

Samtang ang mga PME (Fathers) diri sa Davao, giimbitar man gud to sila (mga Maryknoll Fathers) sa mga PME kay para sa mga PME kadtong mga missionary from Canada, from Quebec especially, gidak-an ra kaayo sila sa ilang scope diri sa Davao City ug Davao del Sur, mao to nga ilang gihatag sa mga Maryknoll Fathers ang Northern part ug ang Mati, usa ra man na sa una.

Sa dihang misulod ang mga Maryknolls, maingon nako nga ang Gagymay’ng Kristohanong Katilingban mao toy usa sa mga nindot nga gasa kaayo nila sa among Diocese, diin nidaghan na ang among bokasyon ug labaw pa usab ang mga Layko sama kaninyo nga dili pari ug madre nakahigayon pud sa pagpangalagad sa Gagmay’ng Kristohanong Katilingban.