Ika-25 nga kapistahan sa San Miguel Panacan gisaulog nga puno sa gugma

Usa ka bulan na ang milabay sa pagsaulog sa ika-25 ka tuig nga kapistahan ni Sr. San Miguel sa Panacan apan wala pa gihapon nakalimtan sa mga parokyano ang kaanindot ug dakung kalampusan sa maong selebrasyon.

Gipanguluhan sa kanhing kura paroko Fr. Edsel Paloma ang kinatibuk-an nga kalihukan sama sa mga kalingawan nga gisalmutan sa tanang GSL ug mga parokyano sa San Miguel.

Lain-laing klase sa kalingawan sama sa Zumba Contest nga gipahigayon sa milabay nga Septiembre 26, 2019 didto sa bag-o nga basketball court. Aduna usab Cheerdance Competion sa mga batan-on ug basketball exhibition tali sa Selected GSL ug Davao Clergy. Nasungkit ang kadaugan sa Davao Clergy niadtong tungura.

Ang ika-25 nga selebrasyon sa kapistahan sa San Miguel mao ang pinaka grandyoso ug pinakanindot nga selebrasyon sa sulod sa kasaysayan sa parokya. Kini ang unang higayon nga makita ang pagtimbayayungay ug kalambigitan sa tanang kalihukan sa usa ka tumong.

Nasurpresa ang kadaghanan sa nakita nga kahiusahan, kadaghan sa mga parokyano nga nakigsaulog sa espesyal nga selebrasyon sugod sa unang adlaw sa nobena hangtud sa mismong adlaw sa kapistahan. Walay kakapoy ang liboan ka mga parokyano ang miduyog sugod sa Santos nga misa hangtud sa gabii nga kalingawan.

Labaw pa nga nalipay ug wala katoo sa mga nindot ug bag-o nga mga talan-awon ilabi na sa taas nga dapit sa parokya sama sa maanindot ug bag-o nga kombento, halapad nga basketball court, nindot nga seminar hall 2 ug ang mga landscaping sa palibot. Ang tanan nga nakakita niini dili makatoo nga sa hamubo nga panahon adunay daku nga kabag-uhan ang parokya. Sumala pa sa kanhing kura paroko Fr. Bebz Bastasa ang kasamtangan sa parokya mao ang katumanan sa usa ka damgo lamang sa pagsugod sa parokya. Ug kining tanan tungod sa maayong pagdumala ni Fr. Edsel Paloma inubanan sa Parish Coordinating Council, GSL tanang ministriya ug organisasyon.

Ang kapistahan ni Sr. San Miguel nga gisaulog sa milabay nga Septiembre 28, 2019 nga gipanguluhan sa halangdong Arsobispo sa dakbayan sa Dabaw ug CBCP President Arsobispo Romulo G. Valles, DD gisaulog nga puno sa gugma. (Liz Gilbuena | SMP Parish SoCCom)