Up, Rising Youth Camp 2019 sa Santiago Apostol nagmalampuson

Niadtong Nobyembre 9-10, 2019 (Sabado hangtod Domingo) gipahigayon ang UP, RISING YOUTH CAMP 2019 isip panapos nga aktibidad sa Year of the Youth nga adunay tema base sa Efeso 5:14 “Awake, O sleeper, and arise from the dead, and Christ will shine on you”, sa tanang mga batan-on sa Santiago Apostol nga gipangunahan sa Kura Paroko nga si Rev. Fr. Rolando O. Mandreza, DCD didto sa Pablo M. Piatos Sr. Integrated School nga gipanguluhan sa principal nga si Sir Jose J. Duller. Diin adunay misalmot nga 227 ka mga batan-on nga gipanguluhan ni Jessa V. Deocampo (Parish Youth Apostolate) inubanan sa mga aktibong miyembro sa Parish Youth Core-Group.

Ang maong aktibidad gisugdan ug Santos nga Misa nga gipanguluhan ni Rev. Fr. Rolando O. Mandreza, DCD. Sulod sa maong misa, mipadayag ang kura paroko sa tanang mga batan-on nga dili na magsige og katulog sa mga sugo sa Ginoo ug mamahimong modelo sa ubang batan-on nga nahisalag na. Giawhag usab sa kura paroko ang mga batan-on nga mamahimong kahayag sa uban pinaagi sa pagbuhat og maayo aron makapahimuot kini sa Ginoo. Dugang pa niini, siya miingon nga “magpartisipar sa mga aktibidad sa youth camp”.

Sa duha ka adlaw nga gipahigayong youth camp, gitutukan ang paghatag og katekismo sa basic fundamentals of Christian Initiation nga mao ang sulod sa sessions. Adunay tulo ka Sessions nga mao ang “The Sacrament of Baptism”, “The Sacrament of Confirmation”, ug “The Holy Eucharist”. Sa unang Talk nga mao ang “The Sacrament of Baptism”, nga gihatag mismo sa kura paroko nga si Rev. Fr. Rolando O. Mandreza, DCD, gipahinumduman ang mga kabatan-onan nga isip mga binunyagan sa simbahang Katoliko, makabaton dapat og kaalam sa lima ka simbolo sa bunyag nga mao ang “Sign of the Cross, Water, Oil of Chrism, White Cloth ug Light” ug makasabot unta sa misyon nga nadawat sa bunyag nga mao ang “Pagkahari, Pagkapari, ug Pagkapropeta.

Dugang pa niini, gihatag ni Rev. Fr. Elvie Burdios, DCD ang ika-duha nga TALK nga mao ang Sacrament of Confirmation diin nahitabo ang usa ka TALK SHOW kauban sila Sr. Terry Bitas TDM ug Sr. Mona Godinez TDM usa ka Postulant. Gipasabot ni Rev. Fr. Elvie Burdios ang sakramento sa kumpirma sa mga batan-on ug miingon “angay lamang na magpakumpirma ang usa ka binunyagan labi na ug sakno na ang edad niini kay diria madawat ang mga gasa sa Espiritu Santo.”

Nagpadayag pud si Sr. Terry Bitas ug Sr. Mona Godinez sa importansya sa kumpirma. Human sa maong talk show, gisugyot pud sa speaker na mga madre nga mamalandong sa bokasyon nga pilion. Giawhag nila ang mga batan-on nga mutisting og search-in sa mga kumbento o seminaryo aron matabangan sa pagpili sa bokasyon sa mga batan-on.

Ang ika-tulong talk kay mao ang “The Holy Eucharist” na ghatag ni Sir John Daryll D. Rillo, usa ka propesor sa Philosophy ug Social Sciences sa Ateneo de Davao University, diin iyang giawhag ang mga batan-on nga musimba matag Domingo ug mangalawat kay kini ang pinakataas nga porma sa pag-ampo ug pagdayeg sa atong Ginoo. Ang maong mga pamalandong nakatabang gayud sa mga batan-on nga mamahimong maalamon aning pagtulun-an ug makadungag sa ilang pagtoo sa atong Ginoo ug sa simbahan.

Sa katapusan, gitapos kini sa Santos nga Misa nga gipanguluhan sa Kura Paroko nga si Rev. Fr. Rolando O. Mandreza, DCD diin siya miingon, “Kitang tanan iya sa Diyos ug hinaut nga makabaton kita sa kinabuhing walay katapusan pinaagi ni Kristo Hesus. Ug ang kalampusan sa youth camp kay grasya sa Ginoo”. Giawhag usab ni padre ang mag batan-on nga musubay sa madasigong mualagad sa Gagmayng Kristohanong Katilingban. Dako gayud ang pasalamat sa atong Kura Paroko sa mga taong nagpaluyo sa maong aktibidad kay kini nagmalampuson. (An-Jean V. Naraga | SJAP SoCCom)