PDART Orientation gipahigayon ug malamposon

Ang Parish Social Action sa St. Joseph Parish, Sasa, nag-organisar og Parish Disaster Action Response Team (PDART) sa tinguha nga makatubag og hinanaling pagtabang ngadto sa mga pamilya sa panahon nga makasinati og kalamidad.

Human sa paghatag og PDART Information dissemination ngadto sa mga GKK Servant Leaders panahon sa General GSL’s Assembly. Niadtong Nobyembre 9, tibuok adlaw gipahigayon ang PDART Orientation ngadto sa 70 ka mga partisipante nga gilangkuban kini sa pipila ka Pangulo sa Alagad ug mga GKK Volunteers nga Batan-on ug hamtong. Dinasig sa kura paroko Rev. Fr. Leonardo A. Dublan, Jr. gi-imbita ang mga Quick Response Team gikan sa San Pablo Parish, Matina. Sila ang nagdumala sa maong Orientation.

Matod pa sa maabtikong PSA Coordinator, Amie Gravino, kini malampuson kaayo ug ang mga gihisgutan makaikag ug maayo kaayo ang pagpasabot.

Ang sunod nga hugna nga mahimo’g sa pagbansay sa kahanas nga himuon sa dili madugay, aron mamugna ang GKK Emergency Response Team (GERT) sa 42 ka mga GKK nga sakop sa parokya. (Amie Desquitado | SJP SoCCom)