Time out to Team up

MATI CITY – Nag-usik og panahon sila aron magkauban sa Retreat sa Maritime Training Resort sa Holy Cross of Davao College (HCDC) sa Camodmod, Island Garden City of Samal (IGACOS), Nobiyembre 7-9, 2013.

Nagkauban ang mga 46 ka mga nag-alagad sa Catholic Media Network (CMN) Mati—Trinity Cable Television (TCTV) ug DXHM-AM/DXDV-Spirit FM, 7 ka Clergy House workers, ug 6 gikan sa managlahing apostolado, ug si Obispo Patricio H. Alo, aron magpahulay usa gikan sa pagpanarbaho ug gamiton ang bulawanong higayon sa paglantaw kon giunsa ba pagpuyo ang hiniusang tumong ug misyon sa pag-alagad sa diyosesis sa Mati diha sa buhat sa Ebanghelisasyon alang sa kaluwasan sa mga kalag; ug kini pinaagi sa madasigon nga paggiya ni Retreat Director Fr. Edilberto “Loloy” Mahinay.

Gipili ni Fr. Loloy ang mga panghitabo sa kinabuhi ni Jesus nga iyang gitukma ngadto sa mga gitawag sa Ginoo alang sa iyang misyon ug pinaagi sa mga yanong pagtulon-an sa tawhanon ug ispirituhanong kahingkod, mga praktikal nga ideya ug personal nga kasinatian sa pamilya, seminaryo ug katilingban, ingon man, mga makalingaw nga group activities, napahatud sa pari ang kabililhong mensahe ug hagit sa Righteous/Holy Living ug Team Building nga nagabarog sa kamatuoran ug moralidad, ug nga makab-ut gayud sa tanan pinaagi sa grasya sa Diyos.

Matag adlaw giampo ang Santos nga Rosaryo ug gihalad ang Sakripisyo sa Sagrada Eukaristiya pinangunahan nila Bishop Alo ug Fr. Loloy, ug sa ikaduha nga gabii gipahigayon ang rito sa paghinulsol ug pagpenitensya kon diin gisaulog usab ang Sakramento sa Pagkumpisal.

Gikahimut-an usab kaayo ang katapusang aktibidad sa pagphimo sa matag grupo og dako nga kasingkasing kon diin ang matag usa ang nagsulat sa ilahang gipangandoy nga hiyas o gawi nga gusto nilang makuptan o mabatonan sa ilahang pundok., aron mopitik gayud ang usa ka bag-ong kasingkasing nga magpakita sa mga timaan sa maalagaron, matarung, masaligon, mahinungdanon/dili mausikon, mahigugmaon, ug malipayon nga piniyalan sa kompanya sa diyosesis.

Apan, way usik ang panahon karon alang sa panaghigalaay, matud pa ni Fr. Loloy, “because wasting time like this with one another will enable us to get to know each other better, bear fruit in stronger relationships, and most of all, in our soul-deep relationship of Faith with God in the love of Jesus,” dugang sa pagpunting kang Birhen Maria ug San Jose ug ubang mga santos isip mga modelo sa balaanong kinabuhi atubangan sa mga tentasyon sa modernong panahon.

Agig pagpasalamat ug pag-ila sa matandugon kaayong pagdala sa retreat director, unanimous ang padayag sa tanan nga siya gihapon maoy magdala sa grupo sa sunod nga retreat sunod tuig…pohon.