Ang huyang nga pagtoo matay-og

Sama sa simbahan nga walay bakal nga mahugno panahon sa linog, ang pagtoo nga dili lig-on matay-og ug mahugno panahon sa mga pagsulay.

Kini ang giingon ni Bishop George Rimando sa iyang pagpaambit mahitungod sa Ecclesiastical Foundation of Basic Ecclesial Communities atol sa paghimo sa BEC Vicariate Gathering sa St. James Parish, Bunawan, October 26.

Giingon ni Bishop Rimando nga kini ang luya ug kulang sa pagsabot sa kaugalingong pagtoo kasagaran mao ang hinungdan nga adunay pipila sa mga Katoliko nga mibiya sa Simbahan.

“Kung dili kita kasabot sa ato pagtoo, mabira gyud ta sa lain ani,” sumala niya.
Gihagit usab niya ang mga laykong lideres nga mahimong lig-on sa ilang pagtoo. Ug mas sabton nila ang Katolikong pagtoo.

Ang BEC Vicariate sa St. James Vicariate gipahitabo sa St. Joseph the Worker Parish, Sasa. Ang Vicariate gilangkoban sa parokya sa Sasa, Panacan, Tibungco, Bunawan, ug Lasang.
Kini ang ulahing BEC Vicariate gathering una saulogon ang katapusan sa pagsaulog sa Tuig sa Pagtoo kon Year of Faith, Nobyembre 23.