PYD sa ALP: Halandumon

Nahimong halandumon gayud nga kasinatian sa mga misalmot nga kabatan-onan sa Parish Youth Day sa Ascension of the Lord Parish.

Ciento treinta ka mga kabatan-onan ang gipang-apod-apod sa napulo ka mga zona alang sa tulo ka adlaw ug upat ka gabii nga temporaryong pagsagop kanila sa gitawag nga mga foster parents.

Tumong sa maong kalihukan mao ang isip pagtak-op sa Youth Cross Pilgrimage ug ingon man isip pagtak-op sa Tuig sa Kabatan-onan.

Sa iyang homiliya atol sa paglusad sa Parish Youth Day, gihagit ni Fr. Zenon Ampong, kura paroko sa Ascension of the Lord, ang mga kabatan-onan nga mamahimong mga piniyalan ug aktibong ipadayag ang ilang kaugalingon isip mga kabatan-onan karon ug dili kabatan-onan sa umaabot.

Samtang temporaryong gisagop ang mga kabatan-onan sa ilang mga foster parents, gipahigayon usab matag adlaw ang mga talks ug uban pang mga team building nga mga kalihukan sa parokya sa Ascension.

Sa hamubo nga panahon, na-develop ang kasuod sa mga partisipante ug ingon man sa mga kataban-onan ngadto sa ilang mga foster parents.

Gipasidunggan ug gilingaw sa mga kabatan-onan ang mga foster parents pinaagi sa gihimong Parish Youth Night niadtong Sabado, Oktubre 26, diin nakadawat ug sertipiko ang matag foster parent nga nagpadayag sa dakong pasalamat sa core group sa Parish Youth Coordinator ug Core group sa kooperasyon nga nahimong malampuson ang kinatibuk-an nga kalihukan.