Batan-on ka, Disipulo ka ba?

Kapin 200 ka mga batan-on sa Ascension of the Lord Parish ang mitambong sa gipahigayong Youth Camp 2013. Sa sulod sa tulo ka adlaw ug duha ka gabii, nagsentro ang mga aktibidades sa tema nga “Go and make disciples of all nations” (Mt. 28:19). Kini dinasig sa tema sa World Youth Day ug sa misyon sa parokya.
Aron mahatagan gayod og pagtagad ang mga partisipante, gibahin sa tulo ka grupo ang ang mga batan-on nga gikan sa 30 ka GKKs. Ang unang grupo nag youth camp niadtong October 11-13, gisundan sa ikaduhang grupo niadtong October 18-20, ug ang ikatulong grupo niadtong October 28-30. Kini gipahigayon sa Camp Alano, Toril, Davao City.

Kini nagmalampuson tungod sa pagtinabangay ug pagtinambayayongay sa mga lideres sa PYACG nga gipanguluhan ni Kristine Paula Saquin ug sa Ascension Young Professionals nga gipanguluhan ni Angelou Monton.

Tinguha sa youth camp nga ang mga batan-on nga gikan sa 30 ka GKKs:

(1) maka-amgo sa pagka-disipulo; tungod niini adunay input nga gihatag nila Vicky Anghag, Edith Asis, Cynthia Dayoan ug Ronald Arcillas nga nagpunting sa misyon sa pagkadisipulo sa usa ka batan-on;

(2) makaila-ila sa mga kaubang batan-on sa parokya, maka-paambit sa tagsa-tagsa ka talento ug kasinatian ngadto sa uban; tungod niini adunay team building, amazing race, sharing ug solidarity night; ug

(3) madasig sa pagtahan sa kaugalingon diha sa makahuluganong pag-apil sa mga kalihukan sa GKK ug sa parokya; tungod niini ang highlight sa youth camp mao ang Santos nga Misa kung diin masinati si Kristo nga maoy tinubdan sa tanan. Gipanguluhan ang Santos nga Misa ni Rev. Fr. Leonardo Dublan Jr.
Ang youth camp nga gipahigayon sa parokya sa Ascension nagtangag sa pangutana nga nagkanayon, “BATAN-ON KA, DISIPULO KA BA?”
Kung disipulo ka, aduna kay misyon! Mao nga, “GO AND MAKE DISCIPLES OF ALL NATIONS!” (Mt. 28:19).