Panaw duaw sa Mahal nga Birhen ngadto sa mga GKK

“Mama Mary, pray for us and lead us to Jesus”, mao kini ang mga pag-ampo kanunay sa mga GKK Servant Leaders ug mga miembro sa matag katilingban nga bisitahan sa Mahal nga Birhen. Gipahigayon ang panaw duaw sa Mahal nga Patron – Santa Maria sa Kanunay’ng Pagrosaryo ngadto sa mga Gagmay’ng Kristohanong Katilingban (GKK) nga nahisakop sa St. Mary of the Perpetual Rosary Parish sa Buhangin. Kini ang unang higayon nga gihimo ang panaw duaw isip pagpangandam sa umaabot nga ika-33 ka tuig nga kapistahan sa Parokya sa St. Mary of the Perpetual Rosary.

Gisugdan ang panaw duaw niadtong August 3, 2019 diin adunay pag-ampo nga gihimo sa pagpadala sa Mahal nga Birhen ngadto sa mga GKK ug pagbendisyon nga gipangulohan sa Kura Paroko, Fr. Dionisio Tabiliran sinaksihan sa mga miembro sa parish pastoral council (PPC).

Ang GKK sa Sr. Sto. Niňo, Lapanday, Tigatto maoy unang giduaw sa Mahal nga Birhen nga sila pud ang nikuha ngadto sa Parokya. Adunay paghalad og pag-ampo ug pagrosaryo nga gipahigayon sa pag-abot sa Mahal nga Birhen sa matag GKK ug mga input mahitungod sa kasaysayan sa Parokya ug mga hiyas ni Santa Maria ug ang iyang pagka inahan sa Dios. Ang mga miembro sa katilingban nigahin usab og oras alang sa pagbihilya.

Kada adlaw e-prusisyon ang Mahal nga Birhen ngadto sa sunod nga GKK diin adunay 54 ka mga GKK ang iyang bisitahan. Sa September 25, 2019 ang katapusang adlaw sa panaw duaw ni Santa Maria sa Kanunay’ng Pagrosaryo sa GKK Sta. Teresita, Green Orchard sa Cabantian diin ang maong katilingban ang responsable sa paghatod sa Mahal nga Birhen ngadto sa Parokya aron sugdan ang novena prayer ug misa sa September 27, 2019 isip pagsugod sa pagpangandam sa kapistahan niini sa umaabot nga October 6, 2019.

Mapasalamaton ang mga parokyano sa Kura Paroko, Fr. Dionisio Tabiliran sa gipahigayon nga panaw duaw sa Mahal na Patron – Santa Maria sa Kanunay’ng Pagrosaryo tungod kay talagsaong higayon kini nga nahitabo ug malipayon ang mga GSL ug mga miembro sa nagkadaiyang katilingban tungod pinaagi niini napalaum ang pagtoo sa atong Ginoo ug debosyon sa Mahal nga Birhen. (Hermie Mapute | SMPRP SoCCom)