Sa panahon sa katalagman, napalig-on ang pagtoo sa Dios

Karong Dominggoha Nobiyembre 24, ang tibuok Simbahan sa kalibutan nagasaulog sa Piyesta sa Kristong Hari. Mao usab ang gitakda nga pagtapos sa atong Tuig sa Pagtoo sa Simbahang Katoliko. Gihimo kini aron sa pagpukaw ug pagpalig-on sa pagtoo sa mga Katoliko, ug aron sa ingon magmalipayon ug madasigon nga mopadayon nga mosaksi sa pagtoo ngadto sa kalibutan.

Ang tulo ka dagkong Bagyo, ilabi na si “Yolanda” ug ang usa ka linog sa Bohol, niining tuiga naghatag gayud nato og higayon diri sa Pilipinas nga mapadayag kining pagtoo taliwala sa kangingit sa kaalaot tungod sa katalagman. Ang daghang mga hut-ong sa sosyodad nagkalambigitay, nagtinampohay, nagkahiusa, nagorganisa sa atong mga panahon, kaalam, ug katigayunan aron sa pagtabang sa mga naalaot. Ato kining gitawag BAYANIHAN, DAMAYAN, ALAY KAPWA, CARITAS. Napadayag pagusab ang pagsalig sa kaayo ug pagkamabination sa isigkatawo.

Taliwala sa pagmata nato sa laing kalamidad nga bunga sa illegal nga PDAF, DAP ug lain pang mga susamang paggamit sa pundo sa gobiyerno, napukaw ang konsiyensya, ang kahadlok sa Dios, ang paghigugma sa isigkalungsuranon ug isigkamagtotoo, ug nagmahinulsolon. Nagsakripisyo ang nagkalainlaing sektor sa pagpagula ug pagimbistigar bahin sa maong pagpangawkaw. Ug bag-o pa lamang, gihukman na sa Korte Suprema nga supak sa Batakang Balaod ang PDAF! Ug ang atong mga politiko naulaw pud nga mitahod sa hukom sa Korte. Kining klase sa mga panghitabo bunga sa gitawag nato nga – REPARATIVE PENANCE ug RESTORATIVE JUSTICE. Ang Dios, buhi gayud diay ug magmadaugon gayud ngadto-ngadto ang katarong sa Dios.
Karong Dominggoha sa Kristong Hari, pagahimoon nato ang pagbag-o sa mga PANAAD SA ATONG BUNYAG, ang unang sakramento sa Pagtoo nga atong gisaulog. Isumpay usab dinhi ang PAGTUGYAN SA ATONG MGA KRISTOHANONG BANAY NGADTO SA MAHAL NGA KASINGKASING NI HESUS. Dili kini nato baliwalaon, tungod kay tinud-on baya gayud pagdawat kini sa Dios gikan sa iyang Lungsod nga Pilipinhon.

Mag-ampo kita:
Ginoong Jesucristo, among gihalad among kaugalingon nganha kanimo karong adlawa– ang matag-usa kanamo ug kaming tanan isip usa ka banay. Ang imong Mahal nga Kasing-kasing, ang kasing-kasing sa imong gilansang ug nabanhaw nga Lawas, mao ang kanunay’ng buhi nga tuburan sa kaluoy ug grasya, paglaum ug paghigugma alang kanamong tanan. Busa buot kaming motugyan sa among kaugalingon ug among kinabuhi isip balos kanimo.
Mahal nga Kasing-kasing ni Jesus, tabangi kami sa pagpahilayo sa sala gikan sa among kinabuhi aron makabig ug mausab kami nianang kausaban nga magsugod sa among pagbalik kanimo ug sa pagtagad sa among kaigsuonan ug sa “adlaw-adlawng pagpakamatay sa kaugalingon.”

Nangandoy kami sa imong Mahal nga Kasing-kasing Ginoo sa among pag-amping sa among kasing-kasing duol sa imoha, ang among nasud matukod, uban sa grasya sa Espiritu Santo isip tinuod nga katilingbang Pilipinhon hiniusa ang kasing-kasing uban kanimo Jesus ug uban ni Maria (ug Jose)* hiniusa diha sa pangandoy ug pagpaningkamut sa pag-abut sa Gingharian sa Dios.

Pinaagi niining PAGBAG-O, PAGHALAD UG PAGKAKABIG, ug diha sa paglakat padulong sa Gingharian, among gibag-o ang among paghalad nganha sa imong Mahal nga Kasing-kasing, ug uban sa Putli nga Kasing-kasing ni Maria alang sa dugang kahimayaan sa atong Amahan sa Langit. Amen. (kinutlo gikan sa “Paghalad ug Pagtugyan sa Mahal nga Kasingkasing ni Jesus”)