Ika-50 nga kapistahan sa Barangay Sang Virgen gisaulog

Kalimaan ka tuig nga kapistahan sa Barangay Sang Virgen (BSV) gisaulog sa parokya sa San Antonio de Padua, Agdao niadtong Oktubre 27, ubos sa tema: KALIM-AN KA TUIG DIHA SA PAGTOO UG PAG-AMPO UBAN NI BIRHEN MARIA.
Upat pa lamang ka bulan nga natukod ang simbahan sa Agdao, San Antonio de Padua, nahimugso ang pinakaunang organisasyon ang Barangay Sang Virgen ubos sa liderato ug pagpanguna sa kanhing unang principal sa Holy Cross of Agdao ug nga nihimong Mayor sa Malita, Davao Del Sur, Mr. Benjamin Bautista. Ang ilang tumong ug tuyo nga makahibalo ug mapalapnag ang pag-ampo sa Santos nga Rosaryo matag panimalay.

Ang mga deboto sa Bulahang Birhen Maria sa Barangay nagsadya, naglipay ug naghudyaka sa pagsaulog sa kapistahan. Diha sa kaadlawon adunay prosesyon bitbit ang mga standarte ug misunod dayon ang Santos nga Misa pahinungod kang Birhen Maria ug pagkahapon adunay programa ug salosalo nga gipangunahan ni Padre Toto España kasamtangan kura paroko ug ni Renato Castro Sr., Coordinator sa BSV.

Halandumon ug bulawanon kining maong kapistahan dili tungod nga kausa lang ang ika-50 mahitabo apan dili makalimtan, kay ang parokya sa Agdao dili lang kausa magsaulog og kapistahan kundili kaduha, pista ni San Antonio de Padua ug ni Maria ang Birhen sa Barangay.

(Gary Guivencan/dcherald)