Isulti ang kamatuoran ayaw ang bakak

Ika-25 nga Domingo sa Ordinaryong Panahon
Am 8:4-7 / Ps 113:1-2, 4-6, 7-8 / 1 Tim 2:1-8 / Lk 16:1-13 or 16:10-13

Usa ka adlaw’ng Domingong nitambong ko og usa ka misa dinhi sa usa ka parokya sa Davao. Kahuman sa misa naay niduol nako nga batan-ong lalaki, ug ako siyang gitakad. Iyang nabal-an nga usa ko ka brother, kay tungod iya kong nakita sa usa ka selebrasyon nga akong gitambungan. Niduol siya tungod kay naay siya’y gustong ipa-ambit nako mahintungod sa iyang problema, dili kaayo bug-at apan malipayon ko nga gisaligan ko aning tawhana, niduol siya aron pagpagawas sa iyang gibati. Nangayo siya sa akong cellphone number ug akoa pod gihatag.

Kung dili siya busy sa iyang trabaho, usahay iyaha kong imbitahon og pagpanggawas ug mag-share siya sa iyang mga kasinatian sa kinabuhi. Dinha sa iyang mga pagpaambit sa iyang kasinatian maka-ingon ko nga mas lalom pa siyag panlantaw sa kinabuhi kaysa nako kun gi-unsa niya pagbalanse ang iyang kinabuhi sa Ginoo ug sa iyang kaugalingon, sa ato pa mas daghan kong nakatunan sa pagpaminaw niya.

Usa ka adlaw, sa kaayo sa among panag-uban kining tawhana wala ko nagtuo nga gipeke niya ang ubang impormasyon mahitungod niya (kung taga asa siya, unsa iyang trabaho, ug uban pa), (I felt betrayed and I asked myself why) (He was telling me his ideal self not his real self). Pero wala ni nako giingon niya dayon para dili siya maulawan.

Kinsa kadtong kasaligan sa gagmayng butang, kasaligan usab sa dagko. Ug kinsa kadtong limbongan sa gagmayng mga butang, limbungan usab sa dagko. Haom kaayo ang akong kasinatian niining Ebanghelyo nato karon wala man ko nagdumot kaayo niya apan sa Ginoo siya manubag sa iyang gibuhat. Walay problema ang pagsalig og balik kun siya andam ug maningkamot ug makaamgo siya sa iyang gibuhat sama sa piniyalan sa atong ebanghelyo iyang na-realize na nagahilapit na ang sangputanan nga siya papahawaon na sa Ginoo tungod sa iyang malimbungon nga pagserbisyo. Apan atong hinumduman bisag unsang pagpanlimbong ang atong buhaton ang Ginoo mangitag paagi aron mogawas ang kamatuuran.

Ug si Hesus nipadayon sa pag-ingon, “Busa kun kamo dili kasaligan sa inyong paggamit sa bahandi niining kalibotana, kinsay mopiyal kaninyo sa tinuod nga bahandi? Ug kun dili kamo kasaligan sa mga butang sa uban, kinsay mohatag kaninyo sa mga butang nga inyo.” Mao kini ang tubag usab sa atong unang pagbasa, buhaton ang pagpanlimbong aron sila ang madato kalabing dakong pagpanamastamas sa mga pobre nga hapit wala nay makaon apan wala maluoy ug gilimbungan pa gayod ug katapusan sa pagbasa ang Ginoo niingon, “Dili ko gayon kalimtan ang ilang daotang buhat.” Sa matag pampanlimbong nga atong gibuhat kung dili CCTV camera ang makasako nato ang Ginoo ang naglantaw nato nga mas klaro pa kaysa sa CCTV camera.

Diha sa atong ikaduhang pagbasa si Timoteo nipasalig kanato nga gusto sa Ginoo nga kitang tanan maluwas ug makita ang kamatooran. Apan maluwas lang kita kung kahimotan ta sa Ginoo pinaagi sa pagbuhat og maayo. Midaghan na ang mga limbungan busa ato silang i-ampo kay tungod kinahanglan sab nila og kalamdagan, nga mahayagan unta sila sa kahayag sa Ginoo aron makita ang saktong dalan sa kamatooran. (Mark Joy Guantero Basallajes, OFM)