Pagtubag sa panginahanglan panahon sa katalagman gipalig-on sa OLLP

Tungod sa nasinating mga kahuyang sa pagtubag sa mga panginahanglan kabahin sa nahitabong dakong pagbaha niadtong Miyerkules sa gabii, Agosto 28, nahimugso ang Our Lady of Lourdes Parish Disaster Committee.

Sa nahitabong pagbaha, adunay unom ka Gagmay’ng Kristohanong Katilingban (GKK) nga nalubog sa tubig baha ug upat ang partially affected hinungdan sa paghimugso sa OLLP Disaster Committee.

Kini pinaagi sa direksyon ni Rev. Fr. Leonie H. Espana, DCD, Kura Paroko sa Parokya sa Our Lady of Lourdes sa Bangkal, atol sa 189th Parish Pastoral Council (PPC) binulan nga panagtagbo niadtong Septyembre 1.

Matod pa ni Fr. Espana, ang namugna nga komitiba maoy dugang sa kasamtangan nga Parish Disaster Action Response Team (PDART).

Ang maong pundok gipangulohan ni PDART Coordinator Norjun Bernasor alang sa pagtubag ug pagresponde sa mga panginahanglan sa mga biktima sa kalamidad.

Kini gilangkuban sa pagrehistro alang sa updated list sa mga myembro, pagtigom og donasyon o relief goods, food preparation ug distribution, packing and distribution of relief goods, medical needs, needs assessment, ug ang pakig-alayon sa Barangay Government Unit ug uban pang ahensya sa gobyerno.

Adunay 25 ka GKKs nga nahisakop sa Parokya sa Lourdes, usa sa mga lugar sa Davao nga naila isip nga flood prone area tungod sa sapa sa Talomo ug Pangi. (Vinny G. Bajo | OLLP SoCCom)