Hiniusang pagpanghinlo sa katilingban sa Baliok

Nagtinabangay ang mga miyembro sa mga GKK sa Holy Family Parish sa Baliok niadtong Setyembre 1, sa ilang tagsa-tagsa ka kapilya aron manglimpyo subay sa World Day of Creation.

Sa maong kalihukan, gipaningkamutan usab nga wagtangon ang mga posibleng puy-an sa lamok labi na tungod sa padayon nga nagkataas nga kaso sa dengue. Aduna poy mga GSL nga nag-atiman sa mga tanom palibot sa kapilya.

Matod pa ni Fr. Roger Duhaylungsod, DCD, ang kura paroko, ang gihimong kalihukan usa ka commitment sa pag-atiman sa tanang binuhat sa Diyos ilabina ang katawhan.

Samtang nagpasalamat si Emily Dela Torre, ang GKK Coordinator, alang sa mga pangulo lakip na sa mga miyembro nga nitubag sa maong imbitasyon.

Siya midugang nga bisan dili ciento porsyento sa mga miyembro ang nisalmot, usa na kini ka positibong lakang aron mapadayon ang pagtubag sa panawagan ni Pope Francis sa pag-atiman sa atong pinuy-anan o “common home” saglit wala na kita’y kapaingnan kung padayon ang pagkaguba sa kalibutan.

Hinaot nga ang gihimo sa mga GSL usa pa lamang sa mas halawom nga buluhaton sa pag-atiman sa atong kinaiyahan aron pagpabiling limpyo ang palibot ug malikay sa mga sakit ug makunhuran ang mga insedente sa pagbaha sa katilingban. (Mary Ann Calacat-Huetira | Subject Area Head, Ateneo de Davao Grade School)