Pagpananom og kahoy alang sa pag-amuma sa kinaiyahan

Nagpahigayon ang Parish Social Action Ministry (PSAM) sa Miraculous Medal Parish sa Indangan og Tree Planting Project niadtong Agosto 26, 2019 sa Barangay Colosas, Davao City.

Kini nga kalihukan gihimo agi og suporta sa Encyclical Letter sa Santo Papa Francisco nga nag-awhag sa katawhan sa pag-atiman ug paghatag og dakong bili sa atong kinaiyahan.

Adunay 21 ka mga membro sa PSA kon Pangulo sa Alagad ang niapil sa maong kalihukan pinangulohan sa PSA Coordinator nga si Conrada Mercado ug PSAM Coordinator Charleo Modequillo nga maoy tag-iya sa luna nga pagatamnan sa mga kahoy.

Ang maong grupo mitambong una sa Santos nga Misa sa parokya nga gipangulohan sa kura paroko Rev. Fr. Jesus Samaniego. Human sa Misa nanglakaw na ang maong grupo aron pag-adto sa maong luna.

Sa wala pa magsugod ang pagtanom, adunay hamubo nga pag-ampo ang gipahigayon. Malipayon ang tibouk grupo sa ilang nasinati sa maong kalihukan diin ila gayud nga nahimo ang maong proyekto.

Human sa kalihukan ilang gipanagsaluhan ang mga prutas nga abot sa maong luna nga organic ug sa mga pagkaon nga giandam sa pamilya Modequillo. Mapasalamaton usab sila sa mainitong pag-abi-abi ug pagtimbaya kanila sa maong pamilya. (Elizabeth Ronolo | OLMMP SoCCom)