Dalan paingon mamahimong Diakono

Ang dalan paingon mamahimong usa ka diakono usa ka dalan nga puno og pagsuway ug sakripisyo.

Dili kini usa ka dalan na para kanatong tanan, para kani sa pipila ka mga tawo nga tinawag ug pinili sa atoang Ginoong Hesus Kristo.

Dakong katumanan sa usa ka seminarista ang mamahimong usa ka diakono nga nagdala og dakong responsibilidad sa pagpamahin sa maayong balita ni Kristo sa katawhan.

Si Brother Michael Ondras, Jr. nga gikan sa parokya sa Mintal ug nagpuyo sa Catalunan Pequeño, gipanganak sa Baybay Leyte, usa siya sa mga na-ordinahan ug nahimong diakono adtong Setyembre 2, 2019 sa San Pedro Cathedral.

Una siya nahimong usa ka diakono, samtang siya nag-edad og desisayis anyos, nahimong inspirasyon niya aron mahimong seminarista kay ang iyang nakita sa mga pari ug ang pagmahal sa iya pag ayo sa iyang ginikanan.

Sa iyahang pagpamalandong gigiyahan siya sa Ginoo ug gitawag siya ni Kristo sa kinabuhi sa pagsulod sa relihiyosong bokasyon tungod sa iyang ginikanan kay sumala pa niya, gikan sa ginikanan ug pamilya ang gasa sa bokasyon.

Pag-abot sa panahon, nadesisyonan ni Rev. Ondras nga iyang ihalad ang iyang tibuok kinabuhi ug pagkatao sa Ginoo ug misulod siya sa seminaryo human siya mitapos sa iyang high school.

Samtang naa na siya sa sulod sa seminaryo naglisod siya og adjust kay daghang mga butang nga iyang mabuhat sa una nga di na niya mabuhat sa sulod sa seminaryo.

Gibati siyag kakapoy ug kamingaw sa iyang pamilya kay mao kani ang unang higayon nga malayo siya sa iyang mga ginikanan.

Samtang nagkadugay siya sa sulod sa seminaryo, nakasabot na siya sa kinabuhi sa usa ka seminarista ug nahimo siyang mapasalamaton sa Ginoo sa tanan niyang mga naagian nga naghatag kaniyag kalipay.

Siya nahimatngon nga luyo sa tanan pagsulay sa kinabuhi mopatigbabaw gayud ang iyang paghigugma sa iyang bokasyon maong siya nakalahutay.

Tataw niya, ang kinabuhing pagka-pari puhon daghang mga sakripisyo nga kinahanglan niyang buhaton aron makab-ot ang iyang pangandoy.

Mensahe usab ni Rev. Ondras, alang sa mga ginikanan nga adunay mga anak nga gusto mamahimong pari o madre nga bisan sakit sa ilang paminaw nga mabiyaan sila sa ilang mga anak, apan ang Ginoo nagatawag sa mga ginikanan na ihatag sila sa serbisyo isip pagkapari, madre, relihiyoso ug relihiyosa.

Dapat suportahan sa mga ginikanan ilang mga anak sa ilang napili nga buhaton sa kinabuhi kay diha sila mahimong mas malipayon ug mas mabungahon.

Giingon usab niya nga sa mga batan-on nga nakabati og tawag sa Diyos isip pari o madre nga dili mahadlok nga motubag kay ang Ginoo nga nagtawag dili kamo pasagdan. Siya ang nagtawag ninyo busa Siya pod bahala ninyo maong walay angay nga kahadlukan. (Terrence Arguelles | HCDC Intern)