Kapistahan sa SMP gipangandaman

Usa sa pinakamahinungdanon nga panagtapok ang gipahigayon sa Parish Coordinating Council sa parokya sa San Miguel Panacan sa milabay nga Domingo, Septembre 01, 2019 alang sa dakong preparasyon alang sa ika-25 nga kapistahan ni Sr. San Miguel.

Giplastar ang programa sugod sa siyam (9) ka adlaw nga nobena. Ug labaw sa tanan ang adlaw sa kapistahan.

Isaulog ang adlaw’ng kapistahan 28 sa September sahi sa naandan nga 29. Kini ang unang higayon nga gibalhin sa sulod sa 24 ka tuig.

Nadesisyonan sa kura paroko ang pagbalhin sa petsa sa kapistahan tungod kay ang 29 natunong sa adlaw’ng Domingo ug kini mao ang adlaw nga balaan alang sa pagsimba.

Panahon sa pista adunay daghan nga padula nga pangulohan sa PSB ug ingon man ang panagsangka sa basketball batok sa Davao Clergy vs. Selected GSL.

Gilauman ubay-ubay nga mga bisita ang moabot. Ilabina ang Arsobispo sa dakbayan ug CBCP President Arsobispo Romulo G. Valles, D.D.

Ang kura paroko Rev. Fr. Edsel Paloma mao ang nag-una sa mga plano ilabina sa preparasyon sa himoong Fellowship Lunch ug sa Clergy Night. Buot ug tinguha sa kura paroko nga hapsay ang kinatibok-an nga selebrasyon.

Iyang gi-awhag ang tanang parokyano sa pag-apil sa Santos nga misa ug pagsalmot sa kinatibok-ang selebrasyon sa kapistahan. (Liz Gilbuena | SMP SoCCom)