Our Lady of Fatima Parish mipahigayon og Parish General Assembly

Nahimong sentro ang pagpasabot sa katungdanan sa mga GSL kon GKK Servant Leaders sa gipahigayon nga Parish General Assembly sa Our Lady of Fatima niadtong Agosto 31, 2019 sa UIC Gym Bonifacio Campus.

Ang maong kalihukan inubanan sa tanang GSL sa Parokya, mga Formators ug ang mga miyembro sa Parish Pastoral Council nga gipangulohan ni Rev. Fr. Severino “Ben” Capulong, Jr., ang Kura Paroko sa maong simbahan.

Nalakbitan usab ang pagpalambo sa kasamtangang kahimtang sa mga GKK.

Gihimo ang nasangpit nga kalihokan sa mga lideres isip pagsanong sa kamanduan sa Kura Paroko.

Sa pagpasabot sa mga katungdanan sa mga GSL nagsubay sa Guidelines and Norms on the GKK (Yellow book).

Sa Maong Tigom, ubay-ubay ang nakat-onan sa mga partisipante gikan sa Guest Speaker nga si Ms. Vicky Estoque-Anghag, Archdiocesan BEC Lay Coordinator ug sa Kura Paroko na si Fr. Capulong diha sa makinaadmanong pagbinayloay og mga kaalam ug panghunahuna mahitungod sa kasamtangang sitwasyon sa mga GSL diha sa tagsa-tagsa ka mga GKK.

Giawhag usab ni Fr. Capulong ang mga GSL nga labaw pang palig-onon ang ilang pagtuo sa Dios uban ang hiniusang pakigtambayayong sa komunidad aron mapaabot sa kinabag-ang katawhan ang tinuoray nga tinguha sa Simbahan.

Sa samang higayon, mitaho usab ang pipila ka mga miyembro sa Parish Pastoral Council mahitungod sa mga programa nga ipahigayon sa sunod na mga bulan.

Kini gilangkuban sa paghatag og Pre-Selection Orientation sa mga GKK nga kulang og mga GSL.

Sa mensahe ni Fr. Capulong, mainiton niyang gipasalamatan ang tanang mga GSL ug mga lumilihok sa maong asembliya sa ilang hugtanong suporta sa simbahan. (Novie Ramos | OLFP SoCCom)