Nawala

Ika-24 nga Domingo sa Ordinaryong Panahon
Ex 32:7-11, 13-14 / Ps 51:3-4, 12-13, 17, 19 / 1 Tim 1:12-17 / Lk 15:1-32 or 15:1-10

“NAWALA” kining maong pulonga nga gigamit ni Hesus sa tulo ka sambingay mahitungod sa nawala nga karnero, nawala nga sensilyo, ug ang nawala nga anak. Daghang nawala sa atong kalibutan karon, nawala ang pagtagad og maayo sa atong kinaiyahan, bag-o lang nga atong nabalitaan ang sunog sa Amazon, ug diri sa atong nasod, ang pagmina sa mga kabukiran ang resulta nawad-an ug panginabuhian ang mga lumad nga naay katungod sa yuta sa gitawag nga “Ancestral Domain”. Nawala ang pagtagad sa kinabuhi isip usa ka sagrado ug gusto pang ibalik ang “Death Penalty”, patay bisag asa bisag kadtong mga dili sad-an ma apil pa. Nawala ang kinabuhi tungod sa gyera o terorismo luoy ang mga inosente. Daghang nawala sa ilang kaugalingon, sa ilang panghunahuna, tungod sa paggamit og mga bawal nga droga. Nawala ang dignidad kay tungod gibaligya ang lawas aron lang maka kwarta.

Sa mga ing-aning mga panghitabo makawala og gana, ug paglaom, wala ta kahibalo kung unsa ang sunod nga mahitabo nga wala kita kasayod nawala na diay kanato. Tinuod sakit nga mawad-an kay matod pa sa usa ka hugot nga kanta “kunin mo na ang lahat sa akin wag lang siya” sakit kaayo bisag isa ra sa atong mga gamit ang mawala dili nata mahimutang kay tungod naay bili kanato ug maningkamot ta nga pangitaon ang mga nawala. Ug diha sa atong ebanghelyo atong mabantayan nga ang amahan diha sa pagbalik sa iyang anak bisan pa ug nawala siya kanila kay nibiya gitagad gihapon siya sa iyang amahan ug giandaman sa iyang pagbalik. Diba, ingani ang atong kalipay kung makita nato ang atong gamit pag-usab nga nawala.

Naay usa ka inahan tungod sa ilang kalisod sa kinabuhi kinahanglan niya nga mag abroad aron mabuhi ang iyang pamilya, kinahanglan niyang mubiya sa iyang mga anak sakit mawala ang imong mahal sa kinabuhi bisag kadiyot lang apan kinahanglan pila nga dili mo mag kita. Adunay mga paagi nga magkasultihay apan mas iba gihapon ang naa siya kauban ninyo. Akong mabantayan ning mga senaryo ang pamilya nga mutagbo sa airport aron sugaton ang dugay na nga nawala nilang inahan sa kadugay nga wala sila makita nimo ang kalipay ang kasadya nga makita sila ilang mga nawong. Sa atong ebanghelyo nagsugod ang sambingay nahitungod sa nawala apan si Hesus ni ingon sa katapusan, “karon paglipay ug pag maya”.

Ang kinabuhi aduna usahay maot nga sinugdanan ug kanang atong mga kasinatian makapaluya nato ug makapawala ug pag laom. Apan ang kamatuuran mao kana ang kinabuhi walay shortcut matod pa “walay himaya kung walay kasakit”. Si Hesus nag pakatawo ug ni agi sa kalisod diha sa Krus apan sa katapusan gi bayaw ngadto sa langit ug na banhaw. Ang kinabuhi sama sab sa giagihan ni Hesus, naay lubak-lubak apan padayon lang mawala man ta sa atong dalan nga gi agian atong paningkamutan nga mahibalik kita sa saktong dalan.

Nawala ka na ba? Sunda ang dalan sa kamatuuran, sunda si Hesus nga nag tubos kanimo diha sa Krus. Makasinati kag mga dili maayong kasinatian kana usa ra na sa kadaghang mga pagsulay sa kinabuhi ang labing impotante sa kada pagsulay dili kita mawad-an ug paglaom. (Mark Joy Guantero Basallajes, OFM)