Youth Encounter sa Malabog

Nagpahigayon og pakighimamat sa mga batan-on sa Sona 2 alang sa tumong nga mas hugot nga panaghigalaay human ang Youth Encounter nga gipahigayon sa Sona 2 San Roque Parish sa Malabog niadtong July 22, 2019.

Napadangat nganha sa tagsa-tagsa ka mga batan-on ang mga nakat-onan sa mga (PSB) pangulo sa batan-on sa gipahigayong summer youth camp ug aron mahatagan og importansya ang gugma, ginasahan ug gipiyalan ug gahom nga gihatag kanila sa Ginoo.

Mikabat sa 65 ka batan-on ang misalmot sa maong kalihukan nga naggikan sa GKK sa Sto. Niño – Balinanao, San Isidro – Sumimao, Sr. San Vicente Ferrer – Crossing, San Roque – Communal, Sr. San Vicente Ferrer Balinanao, Sto. Niño – Malipaga, San Jose – Ipil ug San Isidro Labrador – Sumimao.

Sanglit gisaulog man ang tuig sa batan-on ilang gipasidunggan ang Balaang Krus pinaagi sa pagpadangat sa Rito niini nga gipangunahan ni Bro. Erwin Lambucan.

Ang maong Krus simbolo sa ilang pagkabatan-on nga adunay igo’ng kusog nga dili muhunong sa pagpangalagad sa Ginoo ug dili magpapildi sa mga katalagman nga moabot sa ilang kinabuhi.

Gihuman ang programa pinaagi sa unity dance. Matam-is nga mga ngisi ang nihulma nganha sa tagsa-tagsa nila ka mga ngabil sanglit puno man sa kaalam ug kalipay ang maong programa.

Ang maong Youth Encounter sa Sona 2 gipangunahan sa mga PSB isip tubag sa tawag sa ilang mga katungdanan isip lider sa mga GKK tinabangan usab sa giya ni Father Arnold Balaquinto, ang ilang kura paroko, ug sa tanang GSL ug core group sa parokya. (Arlene Tarnate | GKK SoCCom)