Asawang Matuohon, Mensaheng Makapalig-on

KNOT

Naglisud ko ug dala sa akong mga anak sa simbahan kay lahi man ang relihiyon sa ilang Papa. Apan midangop ko kaniya.”

BEBOT BARACA
PANGULO SA PAGPAHIGAYON SA IMPORMASYON
SAN JOSE GKK
ST. JOSEPH PARISH

Ako usa ka PPI sa akong kapilya; nagapahibawo sa mensahe gikan sa parokya padulong sa GKK. Ako ginasulti ang mga panghitabo ug mga kalihukan sa parokya ngadto sa tibook katilingban ug kung unsa man galing ang mga plano diha sa GKK, akong ginapaambit sa mga kaubanan sa katilingban. Ang PPI makatabang pud sa pagpahigayon ug pagahimuon nga mga social action activities, kalihukan ug kahimuan diha sa kapilya. Usahay ako pud ang nagaadto sa meeting sa parokya aron ang mga gikinahanglan nga impormasyon ma spread na gyud. Pareha anang bulan sa
Oktubre, ang Bulan sa Rosaryo, matag gabie ana ko kada alas siyete. Usahay naga andam sa mga kanta kung wala ang naka-assign.
Sa panahon sa Flores de Mayo, naga salmot ko ana para mag-assist sa mga bata. Kada fiesta, grabe ug bongga ang preparasyon ug pagnovena aron mahapsay ang tanan.
Dili nako ikalimod nga grabe ang akong pagtuo bisan pa man na wala ko nidako sa akong Mama ug nagpuyo ko uban sa akong Lola diha sa Tibungco kung diin nagsugod ang akong pagtuo. Gipadako ko sa akong Lola nga naa dyuy Ginoo na hangtod sa pagkadalaga nako, naninguha ko na makahuman ko ug eskwela. Dayon nahimo na nakong panaad na musimba sa San Pedro Cathedral. Nisalmot pud ko sa Charismatic sa Santa Ana.
Diha na pud na time na nagminyo ko ug usa ka Buddhist. Tulo ang among mga anak. Ang dakong hagit g’yud na akong naagian kay unsaon na lang nako ni sila pagpadako nga managlahi mi ug relihiyon sa akong bana.
Apan, samot na g’yud nga nilambo ug nilawom ang akong pagtuo. Bisag unsa man ang akong kinahanglan, naga ampo ko matag gabie ang Ginoo ang nagtabang nako sa bisag unsang mga pagsulay.
Nakahuman sa medisina ang akong kamaguwangan. Kalooy sa Ginoo nakaminyo siya’g ‘tarong’ ug nindot ang pundasyon sa iyang pamilya karon. Hangtod karun, dungan pud sila sa pagsimba kada Domingo. Kung unsa man ang imong gitanom ila pud patubuon ug pauswagon.
Ang ikaduha bisan dili kaayo involved sa kalihukan pero nakahuman pud siya sa iyang pag-eskwela. Kining kamanghuran, hapit na mu-graduate. Aktibo pud siya sa mga kalihukan sa parokya ilabi na gyud sa mga kabatan-onan.
Ako nang gihalad sa Ginoo ang tanan pinaagi sa among pagserbisyo sa katilingban. Sama na lang sa pagtambong sa mga meetings ug seminar sa parokya. Diha nako nakita ang tinood nga kahayag pinaagi sa mga pulong sa bibliya. Kung unsa man ang ilang problema, tuo lang sa Ginoo. Tama man ang gisulti sa Bibliya na mutawag lang Kaniya kay iya kining tumanon sa ubay ubay na paagi hilabi na sa panahon karon sa kalamidad, ato gyud lig-onon ang pagsalig kaniya kay “Hindi natutulog ang Dios.”