Diwa sa pagkamapasalamaton sa ika-69 nga kapistahan sa Sagrado Corazon de Hesus, Calinan

Gipadayag sa Obispo sa Mati, Most. Rev. Apigo, D.D. nga anak sa parokyang Sagrado Corazon de Hesus sa Calinan ang diwa sa pagkamapasalamaton subay sa ika-69 nga kapistahan sa maong parokya.

“Atong pasalamatan ang Ginoo nga human sa 69 ka tuig, anaa pa gihapon ang buhi nga pagtuong Kristiyano ug pagtuong Katoliko,” tataw niya sa iyang homiliya.

Iya usab gipasalamatan ang mga paring nagkonselebrar sa maong Santos nga Misa nga naggikan sa maong bikaryato. Naa usab ang mga relihiyosong madre ug uban pang bisita nga naa na sa laing lugar nagpuyo apan niuli para sa maong kapistahan.

“Nindot nga larawan sa usa ka bikaryato nga nagpadayag sa suporta sa kauban nga pari nga nagdala ug parokya nga nagsaulog sa kapistahan,” tataw niya.

“Matag kapistahan, naa gyud ang diwa sa pagpasalamat. Mao nga kaming mga pari sa Davao nga gikan sa Calinan, niuli mi alang sa vesperas aron magpmisa ug magpasalamat… tungod sa gasa sa bokasyon. Sa kalipay niining diwa sa pagpasalamat, naa ko sa inyong atubangan,” dugang niya.

Gilakbitan usab sa maong Obispo ang tema sa Simbahang Katoliko sa Pilipinas nga nagtuyok sa tuig sa mga kabatan-onan.

“Niining tuiga, Year of the Youth, atong simbahan sa Pilipinas gipili ang tema nga ‘Filipino Youth in Mission: Beloved, Gifted, Empowered.’ Siguro nindot nga sa atong ika-69 nga kapistahan, diha pud nato lantawon ang atong pagpasalamat diha sa tema sa atong simbahan sa tuig sa mga batan-on,” matud niya.

“Sa unsang panlantaw nga atong makita ang diwa sa atong kapistahan ug makita usab nato ang atong pagkapinalangga sa Diyos?” gipamahayag ni Bishop Apigo.

“Sa 69 ka tuig, wala pa na tao ang arsobispo, naa ang katilingban sa Sagrado Corazon de Jesus. Wala pa natawo ang mga naa diri nga pari, mga madre, ug ang pipila kaninyo, naa na ang pagtuo nga Kristiyanong Katoliko dinhi sa atong lugar sa Calinan,” iyang pagpasabot.

Gitataw niya ang iyang pagkamapasalamaton sa buhing pagtuo sa mga parokyano bisan pa man sa mga katuigan. “Ug salamat sa Diyos nga buhi ug gipuy-an gihapon nato kini nga pagtuo!”