Paghulma sa mga batan-on nga mga pangulo, 50 anyos na

Sa bakasyon matag tuig, ginatawagan ang mga batan-on sa matag parokya nga moapil sa pinasahi ug intensibo nga summer youth camp nga molungtad og kwarenta ka adlaw.

Gikan niadtong tuig 1969, namugna ang gitawag nga OPERATION BUILD-UP / Katipunan nga Diwang Sambayanihan kon OBU nga gipasiugdahan ni anhing Fr. Paul Cunanan.

Tumong sa maong kalihukan kon OBU, mao ang pag-umol sa mga kabatan-onan ngadto sa maayong pangulo nga Kristohanon ug maayong sakop sa katilingban. Namugna kini gikan sa pagdumala ni Fr. Cunanan isip director sa Archdiocesan Social Action Center sa Davao gikan 1967 ngadto sa 1974.

50 ka tuig na ang nakalabay apan nagpadayon gihapon ang maong summer youth camp nga ginapahigayon sa Brothers of the Holy Family, Buhangin, Davao City.

Hasta ang mga gawas sa Archdiocese sa Davao naga-apil sa maong summer work camp nga ginadumala sa mga batan-on nga mga volunteers nga mi-gradwar na sa OBU ug council of elders.

Mipuli sa pagtimon sa maong pundok mao ang laing OBU graduate nga si Fr. Paul Dagangon.

Sukad sa iyang pagkatukod, wala gayud magsalig sa mga grants o pundo gikan sa langyawng kanasuran ang maong kalihukan alang sa iyang operasyon. Lunlon nga mga donasyon ug mga sponsorship gikan sa nagkalain-laing indibiduwal ug pundok lamang ang nakapalahutay sa ilang operasyon kinsa usab nagtuo sa panglantaw alang sa total human integral development nga nag-focus lamang sa mga kabataan.

Matag partisipante maghatag usab og registration fee inubanan sa suporta sa ilang mga ginikanan ug uban pang mga sponsors.

Ning tuiga, mag 50 ka tuig na ang OBU kon magsaulog sa golden anniversary sa Agosto 10, 2019. Aron nga mapahibalo ang katawhan sa ilang selebrasyon, usa ka motorcade ang pagahimoon sa alas-7 sa buntag nga maggikan sa ilang buhatan sa dalang Gomez paingon sa San Lorenzo Ruiz Parish sa Talomo diin pagasaulogon ang Santos nga Misa sa alas 10 ang takna sa buntag. Gi-awhag sa publicity ang promotion chair nga si Atty. William Guillen (OBU Batch ‘81) ang tanang mga OBU graduates nga motambong ug magdala og bisan unsang toiletries para igasa sa mga seminarians sa St. Francis Xavier Seminary.

Human sa Santos nga Misa, giandam ang usa ka Fraternal Meal kon salo-salo ug sa ala-una sa hapon mao ang raffle draw ug ang pagpangandam alang sa Gala night nga pagahimoon sa Davao Convention Center sa F. Torres St.