Kanus-a ba gayod ka muabot Ginoo?

Ika-19 nga Domingo sa Ordinaryong Panahon
Wis 18:6-9 / Ps 33:1, 12, 18-19, 20-22 / Heb 11:1-2, 8-19 or 11:1-2, 8-12 / Lk 12:32-48 or 12:35-40

Gikapoy na ba ka sa paghinuwat sa pag-abot sa atong Diyos? O naglaom pa ba gihapon sa iyang pag-abot? Apan ang pangutana adunay bay nakahibalo sa iyang pag-abot?

Tulo ka mensahe ang gipahayag ni Hesus diha sa atong Ebanghelyo nga pwede natong mapamalandongan ug mao ang: AYAW KAHADLOK, PAG-ANDAM ug TIMAN-I KINI, ang pangutana unsa man ang imong gikahadlukan, unsa man ang imong gipangandaman ug unsa man ang angayan nimong timan-an.

Atong susiun ug tukion kining mga mensahe ni Hesus sa atong ebanghelyo. Una, AYAW KAHADLOK. Ug atong ibalik ang pangutana unsa man ang imong mga gikahadlukan sa imong kinabuhi? Sa atong kinabuhi daghan tang mga kahadlok ug sayon nato matubag kini nga pangutana kay matag-adlaw aduna kita’y gikahadlukan ug angayan sab natong pangutan-on ang atong mga kaugalingon nganu kaha? Nganung mahadlok man ta? Wala na ba diay kitay salig sa Ginoo nga maoy nagbuhat sa tanan, maong nahadlok ta? Kining mga kahadlok mao ang gitawag nga yutan-ong kahadlok. Apan wala ba kita naglantaw sab sa atong kinabuhi sa langit? Wala ba kita nahadlok sa pag-abot Niya? Sa atong Ebanghelyo gipasaligan kita ni Hesus nga wala kita’y angay nga kahadlukan kay moabot ang panahon nga kahimot-an ta sa Ginoo sa paghatag sa gingharian, ug unsa kining gingharian nga gisalig ni Hesus, ang malinawon nga gingharian, nga dili na ka mabalaka ug dili na kita angay nga mahadlok pa. AYAW KAHADLOK.

Ikaduha, PAG-ANDAM. Adunay nagkalain-laing klaseng pagpangandam ug nasayod kita kung unsang pagpangandam ang kinahanglan buhaton. Sama sa kung naay bisita nga muabot sa balay, apan si Hesus nagsulti sa pagpangandam mahitungod sa pag-abot sa atong Amahan. Kita sama sa mga suluguon nga nagpaabot sa pagbalik sa agalon. Si Hesus buot ipasabot kanato nga kita isip mga gitugyanan niining kalibutana ang pagpangandam pasabot ani nga ang atong pagtoo sa Ginoo kinhanglan ubanan ug pagbuhat ug mga maayong butang aron sa pagbalik sa agalon iya kitang kahimot-an. Wala bisan kinsa kanato nga nasayod kanus-a moabot ang atong Amahan apan dili buot pasabot nga motrabaho lang kita kung kanus-a hapit na siya muabot. Samtang wala pa Siya miabot atong paningkamutan nga sa iyang pag-abot andam na kita nga muatubang kaniya nga malipayong.

Ug ang katapusan mao ang, TIMAN-I KINI. Usa ka mensahe nga angay natong paminawon, kung si Hesus muingon nga timan-i kini, kini adunay lalom nga mensahe kanato ug bisag si Pedro nga kinahanglan pang mangutana kang Hesus, “Ginoo nagsugilon ka ba niining sambingaya alang kanamo lamang o gitumong mo ba kini sa tanan? Dili tungod kay wala siya kasabot apan may mas lalom nga mensahe si Hesus. Ug gitubag ni Hesus si Pedro dili pinaagi sa OO ug DILI apan gipalawman niya sa pag-ingon, “kinsa ba diay ang buotan ug maalamon nga sulugoon nga maoy tugyanan sa iyang agalon pagdumala sa panimalay ug paghatag sa ubang mga sulugoon sa ilang bahin sa pagkaon sa husto nga panahon”? Ang Ginoo kabalo sa atong mga kahuyang ug kuluyahan ug iya kitang gipahinumduman sa pagpangandam samtang wala pa moabot ang Agalon nga mao ang Ginoo, kini ang mensahe ni Hesus ug timan-i kini, “Busa kamo usab kinahanglan mangandam kay ang Anak sa Tawo moabot sa oras nga wala ninyo paabota.”

Akong ibalik ang pangutana, gikapoy na ba ka sa paghinuwat sa pagabot sa atong Diyos? O naglaom pa ba gihapon ka sa Iyang pag-abot? Apan ang pangutana aduna bay nakahibalo sa Iyang pag-abot?

Ang ikaduhang pagbasa nihatag nato og tubag sa atong pangutana, “Ang kahulugan sa atong pagtuo mao nga may kasigurohan kita sa butang nga atong gilaoman nga dili makita.” Sanglit, ayaw KAHADLOK hinuon PAGPANGANDAM aron sa pag-abot sa Amahan ang tag-iya niining tanan kahimut-an kita kay tungod nagbuhat kita og maayo. TIMAN-I KINI. (Mark Joy Guantero Basallajes, OFM)