‘Huna-hunaa ang mga butang nga langitnon ug dili ang yutan-on’

Ika-18 nga Domingo sa Ordinaryong Panahon
Eccl 1:2; 2: 21-23 / Ps 90:3-4, 5-6, 12-13, 14, 17 / Col 3:1-5, 9-11 / Lk 12:13-21

Usa ka adlaw, aduna koy amigo nga gikuha ko sa balay aron manlaag, nagdrive siya ug ako sa pikas lingkuranan kami lang duha. Ang akong amigo usa ka kugihan ug karon daghan na siya naabot sa iyang kinabuhi. Naghisgutay mi og bisan unsang mga butang, samtang padulong mi sa among adtuan. Ug diha sa among storya nakahisgot siya nga naa siyay plano mopalit og bag-o nga sakyanan ug ako siyang gi-uyunan sa iyang gusto apan nakurat ko nga niingon siya nako, “bisag naa koy ikapalit, dato ang panan-aw sa uban nako, kung kana nga butang dili nako kinahanglan dili na nako paliton, dili paman nako kinahanglan ron dili sa ko mupalit”.

Sa atong kinabuhi o pagkinabuhi nakakat-on kita sa pagpili kung unsa kadtong mga kinahanglan nato nga butang ug dili kadtong gusto nato sa atong kaugalingon (needs and wants).

Sa atong Ebanghelyo si Hesus naghisgot mahitungod sa usa ka dato nga tawo nga hayahay kaayo ang kinabuhi apan nagpakita og kahakog ug iya kitang gipahinumduman nga bisan sa kadaghan nato og kabtangan dili kini ang makahatag nato sa tinuod nga kalipay.

Ang hakog nga pamatasan usa kini ka babag sa gisugo kanato sa atong Ginoo sa paghinatagay, sa pagminahalay. Gisugo kita sa Ginoo sa pagbuhat og maayo sa uban, sa pagtabang sa nanginahanglan. Kung atong palabihon ang atong kaugalingon si Hesus nag-ingon sa atong Ebanghelyo, “Mao kini ang mahitabo kanila nga magtigom og mga bahandi alang sa ilang kaugalingon apan dili dato sa atubangan sa Dios.”

Ang hakog nga tawo bisag dili na niya kinahanglan iyaha gihapong paliton, ang hakog nga tawo naghuna-huna lamang sa iyang kaugalingon, ug ang hakog nga tawo dili kabalo manghatag sa uban. Ang Ebanghelyo naghisgot niining butanga, si Jesus nagpahinumdon kanato nga miingon, “pagbantay kamo ug likayi ninyo ang bisan unsang kahakog kay ang tinuod nga kinabuhi sa tawo wala diha sa mga butang nga iyang gihuptan bisan unsa pa siya kadato.”

Ang ika-duhang pagbasa niuyon aning mga pulonga ni Jesus, gihagit kita sa pagbuhat sa maayong mga butang ug paghuna-huna sa mga butang nga langitnon ug dili ang yutan-on. (Mark Joy Guantero Basallajes, OFM)