Husto ba ang Pag-ampo nato sa mga Santos ug Angheles!

Usa sa mga dakong pagtulun-an sa Simbahang Katoliko mao ang pag-ampo nato ug pagpangayo ug tabang sa mga Balaan o Santos. Gani usa kini ka ilado nga debosyon kanatong mga Katoliko ug daghan gayud ang nagabuhat niini nga debosyon ang pagpangayo ug tabang sa mga Santos.

Ato karong susihon ang rason sa mga dili modawat niini nga pagtulun-an, sila moingon nga dili na gikinahanglan nga kita moagi pa sa uban tungod daw sa hinungdan nga si San Pablo nag-ingon “nga adunay usa lamang ka tigpataliwala tali sa Dios ug sa Tawo, si Kristo nga Tawo” (1 Tim. 2:5), kini nga bersikulo sa Bibliya mao ang sagad nga ginagamit nila nga dili gikinahanglan nga mangita pa kita ug tabang sa mga Santos ug Angheles, ang bersikulo sa Bibliya husto gayud ug kita nga Katoliko wala gayud nakasupak niini, apan ang sayop mao ang pagsabot sa nag-gamit niini, si Kristo mao gayud ang tigpataliwala sa Dios ug sa Tawo, apan wala magpasabot nga dili na kita mangayo ug panabang sa iyang mga Santos ug Angheles, Kay bisan si Ginoong Hesukristo mismo miingon nga mangita kita ug abyan dinhi sa kalibutan (cf. Lucas 16:9), ug kining abyan nga giingon ni Kristo mao kanang mga Santos ug Angheles sa langit, kay sumpay pa sa giingon ni Ginoong Hesukristo nga ang magpasidungog sa iyang balaang katawhan nagapasidungog pod kaniya (Juan 17:10), kay ang pagdangop nato ug tabang sa mga Santos bililhon kini ug mapuslanon gayud alang kanato kay ang mga Balaan o Santos atua naman sa langit ug duol sila sa presensya sa Dios.

Ug adunay dili malalis usab nga kamatuoran nga natala diha sa Bibliya mahitungod sa mga tawong Balaan nga samtang buhi pa makatabang na sa katawhan pinaagi sa ilang mga pag-ampo pananglitan diha sa Job 42:8-“si Job usa ka maayong tawo, busa sa dihang adunay tulo ka tawo nga nakasala batok sa Dios ug naka-amgo sa ilang nabuhat human naghinolsol ug nangayo ug pasaylo sa Dios, ang Dios miingon kanila nga maghalad kamo ug mga sinunug nga halad…ug si Job maoy mag-ampo alang kaninyo”.

Dinhi atong masayran nga dili diay tinomotumo sa tawo ang paagi nga moagi kita o mohangyo sa panabang sa mga tawong BALAAN alang kanato, kay kini usa ka pamaagi ug pagmando sa Dios alang kanato.

Si Sr. Santiago Apostoles ni Kristo miingon nga “ ANG PAG-AMPO SA TAWONG MATARONG O BALAAN DAKO UG KAHIMOAN” (Santiago 5:16), busa usa kini ka pruyba nga dili dautan nga kung kita nga mga buhi mag-ampo ug moagi sa mga BALAAN, kay gani ang kasulatan nag-ingon nga daku kini ug kahimoan.

Kay ang pag-ampo nato sa mga SANTOS dili kana PAGSIMBA KANILA ingon nga DIOS, kondili mitahud kita kanila ingon nga mga ALAGAD SA DIOS (Daniel 2:46), kay ang atong pag-ampo kanila dili ingon nga mangayo kita ug kaluwasan kondili unta i-ampo ta nila sa Dios nga kaloy-an ta ug hatagan pa ug igong grasya nga makalahutay ta sa kanunay, kay bisan gani si San Juan nakita niya sa iyang panan-awon nga ang mga BALAAN sa langit nag-ampo kanunay, adlaw ug gabii sa walay hunong ug maoy nagdala sa mga pag-ampo sa katawhan (Pinadayag 5:8, 6:9-10), busa ang pag-ingon nga sayop ang pag-ampo ug pagpangayo ug tabang sa mga Santos ug Angheles usa lamang ka dakong pasangil kanato nga mga Katoliko ug walay saktong basihan diha sa kasulatan. Busa mga kaigsoonan, kining doktrina sa pagpangayo ug tabang sa mga Santos ug Angheles nagasukad pa gayud sa unang mga Kristohanon, ang dakong hinungdan nga kita mosangpit sa mga Santos ug Angheles pinaagi sa pag-ampo mao nga sila anaa na duol, hingpit nga suod sa Dios ug nakig-uban na kaniya, tungod sa ilang pagka-balaan, busa kitang mga katawhan angay ug makataronganon gayud nga mosangpit kanila dili sa ingon nga maluwas ta nila kondili matabangan ta nila nga mapa duol sa Dios pinaagi sa ilang mga pangamuyo, sama kang San Pedro ang Apostoles ni Kristo nasayod ta nga anaa siya uban kaniya sa langit, kita naga-ingon sa atong pagsangpit San Pedro ig-ampo mo kami, walay boutang Katoliko nga moingon Dios Pedro luwasa kami.