Ika-151 ka Kasaulogan sa Piyesta sa Nuestra Señora del Carmen sa Matina Aplaya, Davao City

Milagroso ang Mahal nga Birhen! Tinuod gayud matud pa sa usa ka lumulopyo nga si Pacita Javier didto sa Matina Aplaya. Mao kana ang kanunay isulti sa mga nagpuyo ning lugar sa Matina. Busa man gani, sa panahon sa Santos nga Misa, puno kaayo ang ilang kapilya ug daghan pa gayud ang anaa sa gula niini kay wala nay luna alang kanila sa sulod.

Matud pa ni Silvia Seronay nga didto na gipanganak sa Aplaya, nga ang estatua sa Mahal nga Birhen sa Carmen, gihatag sa mga Kastila ngadto sa iyang mga apohan, sa ilang mga apohan. Nagtubo siya nga gipahimutang sa ilang mga apohan ang estatua sa usa lamang ka kapilya nga gamay kaayo. Apan karon sa ilang ika-151 ka kapistahan ilang gipaningkamutan nga semento na gayud ang materyal nga gigamit sa tanang bahin sa kapilya ug ang atop galvanized roof na. Sa nag-eskwela na siya iyang naamgohan nga nagkadaghan ang mga tawo sa ilang palibot ug sa gawas sa ilang lugar ang nagbalita nga nakadawat sila sa mga grasya nga ilang gipangayo sa Mahal nga Birhen sa Carmen.

Ang kasaulogan sa Santos nga Misa, gipangoluhan ni Fr. Allan Rodriguez, Vicar Priest sa San Pablo Parish ug ang naghatag sa Homiliya mao si Rev. John Patrick Pelonio ang atong deakono. Matud pa ni Reverend John: Ang matag kasaulogan sa Piyesta usa usab ka Pagsadya. Mipadayon siya sa pagsaysay sa tulo ka punto nga iyang gipaambit sa katawhan nga miapil sa Santos nga Misa. Ang una mao ang: ordinaryong kasinatian sa tawo mahimong tulay sa mga plano, ug tumong sa Dios kanato, tungod kay sa kanunay nagalihok ang Dios diha sa atong kinabuhi. Ikaduha, mao ang: Pahimangno ni Jesus kon gipuy-an ba nato ang atong pagtuo. Sama pananglit sa atong pagtuo sa gahum ni Mama Mary. Nagabansay ba kita sa iyang mga gitudlo kanato nga magmasinugtanon kita sa iyang anak nga si Jesus? Ikatulo: Dugay na nga nakig-uban kanato si Nuestra Señora del Carmen, ngaa mikabat na kini sa 151 ka tuig; aduna bay nabag-o sa atong kaugalingon, nabag-o sa atong pamilya, nabag-o sa katilingban sa Matina Aplaya? (Sr. Rica Dalaguit, FsP)