Sto. Niño de Cebu gisugat sa mga Dabawenyo

Photo by Brenda P. Milan

Kapin libo nga mga deboto ni Sr. Sto. Niño ang niduyog ug nisugat didto sa San Pedro Cathedral, Davao City niadtong Hulyo 04, 2019. Niabot ang maong rebulto ni Sr. Sto. Niño alas nuwebe sa buntag, gidala kini sa mga Augustino nga mga kaparian nga gikan pa sa Basilica Minore del Santo Niño de Cebu. Gipasidunggan kini pinaagi sa mga kabatan-onan nga nisayaw sa Sinulog.

Ang pagbisita sa Batang Hesus usa ka paagi sa pagpangandam sa ika-500 katuig sa pag-abot sa Kristiyanismo dinhi sa Pilipinas nga dakong selebrasyon nga saulugon karong 2021.

Gipangunahan ang santos nga misa ni Fr. Pacipiko C. Nohara, Jr., OSA, Prior Rector sa Basilica Minore del Santo Niño de Cebu. Diha sa iyang homiliya iyang gihagit ang mga ginikanan sa pagpakita og ehemplo sa ilang mga anak, sa pagdala sa ilang mga anak sa saktong dalan kay matod pa niya kung naa ang pagminahalay sa pamilya magdako ang bata nga naay gugma sama sa batang Hesus. Dagang pa niya ang mga kabataan sila ang kaugmaan sa atong nasod, sila ang umaabot nga mga pangulo sa katilingban, sila ang umaabot nga mga magbalantay ug mga umaabot nga magsasangyaw sa pulong sa Ginoo.

Human sa misa ang mga deboto gitagaan og higayon sa paghalok ug paghikap sa imahe ni Sr. Santo Niño. Sa parehong adlawa gibalhin ang imahe ngadto sa Sta. Cruz, Davao del Sur ug didto sa Mary Mediatrix Cathedral sa Digos.

Ang Batang Hesus gilibot sa ubang pang mga diocese ug natapos ang Pilgrimage Hulyo 7, 2019 adlawng Dominggo, ug gihatod sa airport. (Mark Joy Guantero Basallajes, OFM)