Bag-ong Hulagway sa Parokya sa San Miguel-Panacan

Bag-ong talan-awon ang makita karon sa Parokya ni San Miguel Arkanghel sa Panacan. Sa hamubo nga higayon makita ang kapaspas sa kalamboan, mga proyekto, kabag-ohan sa pagdumala sa among pinanggang Kura Paroko.

Dili ikamahay ang pagka strikto ilabina sa panalapi, strikto sa buhat ug pag-implementar sa balaod. Bisan batan-on pa sa pangidaron apan ang iyang batasan amahan gayud.

Sa wala makasinati kaniya makaingon gyud nga sobra og batasan ug hingasaba pa. Dili ikalimud adunay pipila nangaluya sa pagserbisyo tungod kay nakasulti siya og bug-at nga mga pulong. Apan sa tinuod nga nakaila kaniya, makaingon gayud nga pinangga sa Ginoo ang San Miguel tungod kay gihatagan kita og pinakamaayong kura paroko.

Ang atong kura paroko sama kanato mga normal nga tawo, kabalo mobati kung adunay nindot nga talan-awon modayeg, kung adunay madungog nga dili maayo masakitan usab sama kanato. Ang atong kura paroko dili Santos labaw sa tanan dili Ginoo. Apan siya usa ka espesyal nga binuhat sama kanato, adunay misyon dinhi sa kalibutan sama usab kanato.

Ang panahon lumalabay lang ug ang atong kura paroko mulabay lang usab. Apan ang iyang pakig-uban kanato mamahimong makahatag kanato og kabag-ohan pinaagi sa iyang kaugalingong pamaagi nga usa ka pinayalan.

Pagkahuman sa unom ka tuig, iya kitang biyaan, apan una maabot kanang higayuna hingpit ang kanindot ug kalambuan ang matagamtaman sa atong parokya.

Bulan sa Hunyo karong tuiga 2019 nahuman na ang usa ka tuig sa iyang pakig-uban kanato. Atong ubanan ug suportahan ang atong kura paroko sa iyang mga maayong plano alang kanato mga parokyano sa San Miguel Panacan.

Sa makausa pa atong i-apil sa atong pag-ampo ang atong kura paroko nga unta hatagan siya og maayong panglawas ug giyahan sa maayong panghuna-huna aron mapadayon niya ang iyang misyon alang sa mga Parokyano sa San Miguel Panacan.

Kanimo anong pinangga nga Kura Paroko Fr. Edsel Paloma, DAGHANG SALAMAT sa imong pag-abot sa among parokya sa San Miguel-Panacan. (Liz Gilbuena | SMP Parish SoCCom)