Daghan tinuod ang anihonon, apan diyutay lamang ang mga mangangani

Ika-14 nga Domingo sa Ordinaryong Panahon
Is 66:10-14 / Ps 66:1-3, 4-5, 6-7, 16, 20 / Gal 6:14-18 / Lk 10:1-12, 17-20 or 10:1-9

Mga igsoon ko diha ni Kristo, ang atong ebanghelyo naghisgot mahitungod sa pagpadala ni Hesus sa laing kapitoag-duha ka mga tinun-an. Sila gipadala diha sa misyon sa pagsangyaw sa Gingharian sa Dios ug sa pag-ayo sa mga masakiton og giyawaan. Gihagit sila nga dili magdalag puntil, ni sako, ni sandalyas diha sa ilang misyon ug mosalig lamang sa grasya ug panabang sa Dios.

Mga igsoon ko diha ni Kristo, ang atong kalibutan ug simbahan nanginahanglan og mga pari, madre, ug mga layko nga andaw moserbisyo sa Ginoo ug sa iyang katawhan. Sama sa kapitoag-duha ka mga tinun-an nga gipadala ni Hesus sa pagsangyaw sa Gingharian sa Langit, kita usab isip mga binunyagan ug sumusunod ni Kristo gitahasan sa mao rang misyon. Kay kita mga kristiyano man, obligado gyud kita nga mamahimong mga misyonero ni Kristo para sa uban. Nasayod kita nga dili lalim ug dakong hagit ang pagserbisyo o ang pagkamisyonero apan atong timan-an nga kining tanan para sa atong Ginoo.

Sayod kita nga gamay na lang ang andam mohatag sa ilang kaugalingon para sa pagserbisyo sa Ginoo ug para sa katawhan isip mga pari, madre, ug mga laykong lumilihok sa simbahan. Pipila na lang sa mga tawo karon ang andam mosakripisyo para sa Ginoo. Dungagan pa ang mga iskandalo nga gibuhat sa ubang obispo ug kaparian nga nakapaluya ug nakapasubo sa ubang tumutuo. Apan, atong timan-an nga ang atong simbahan puluy-anan sa mga balaan ug mga makakasala. Kitang tanan naningkamot nga mahimong balaan ug buotan. Isip mga sumusunod ni Kristo, hinaot maningkamot kita nga magbinuotan ug awhagon nato ang uban paduol sa Ginoo.

Bisan sa atong pagkamakakasala, dili pa katapusan ang pagbuhat og maayo ug ang pagkamisyonero sa Ginoo. Ang Ginoo wala maglantaw sa atong mga kapakyasan o kapila ba kita nakasala sa iyaha ug sa atong isig’katawo. Ang labaw’ng importante nga kita naningkamot nga mabag-o ug mahimong maayong tawo. Kon ang atong kinabuhi nagsunod sa kinabuhi ni Kristo, kita mga buhing ebidensya nga mga misyonero ni Kristo. (Rev. Efren Gubac, Jr.)