Archdiocesan Skills Training Center gilusad sa St. Joseph Parish

Gilusad ang Archdiocesan Social Action Center (ASAC) Technical Institute Foundation Incorporated sa St. Joseph Parish (Patron Saint of Workers), Sasa, Davao City nga tumong maghatag og pribilehiyo sa tanang parokyano, ilabina niadtong edad 18 pataas, high school graduate ug giindorso sa iyang parokya nga makakat-on og kahanas nga magamit sa umaabot nga panahon alang sa pagpangita og panginabuhian.

Gipahigayon kini pinaagi sa usa ka Santos nga Misa niadtong Domingo, Hunyo 16, nga gisaulog ni Arsobispo Romulo G. Valles, D.D. inubanan sa Kura Paroko, Rev. Fr. Leonardo A. Dublan, Jr., ingon man nila Fr. Pete Lamata, Fr. Zenon Ampong ug Fr. Bong Gonzaga.

Mitambong ang laing mga miyembro sa Board of trustees nga sila Fr. Leonardo A. Dublan, Jr., Fr. Emmanuel M. Gonzaga, ug Victor B. Miclat.

Anaa sab ang laing mga incorporators nga sila ni Elizabeth D. Donasco, Sr. Minda C. Renegado, Ignacio G. Bernaldez, Jr., ug Sr. Teresita Salang. Gisaksihan kini ni Engr. Jun Panes, head sa Training Department sa TESDA.

Naa usab ang mga miyembro sa Social Action Coordinators sa nagkalain-laing parokya ug mga PSA sa St. Joseph Parish.

Segun ni Rev. Fr. Dublan, miabot na sa 80 ang nakakompleto sa mga kinahanglanon alang sa enrolment sa nagkalain-laing kurso sama sa Shielded Metal Arc Welding (SMAW NC I ug NC II), Electrical Installation Maintenance NC II ug Refrigeration and Air-Conditioning (RAC NC I & NC II).

Mahimong makahupot og kahanas nga makatabang sa ilang pagpangita og trabaho ang kinsa man nga mulahutay sa maong programa.

Sila usab makadawat og Certificate of Skills Training gikan sa TESDA.

Magsugod sa bulan sa Hulyo ug molungtad hangtod sa Setyembre ang klase sa tanang skills. Kini pagahimuon matag Sabado ug Domingo gikan sa 8:00 AM hangtod sa 5:00 PM.

Pangandoy sa mga parokyano nga uban sa kalooy sa Ginoo, ang 1st Batch sa training masundan ug mahimong regular na matag tuig.

Atol sa maong higayon gihimo usab dinhi ang paghatag sa panalangin sa dapit sa workshop diin pagahimuon ang training. (Amie Desquitado)