Gasa sa Dios: Golden Wedding gisaulog

Dakong gasa gikan sa Dios ang nadawat sa kinabuhi nila Florencio L. Cardente Sr. ug Virginia C. Cardente diin malipayon nga gisaulog nila ang ilang ika-50 ka tuig nga kaminyoon niadtong April 26, 2019. Gipahigayon ang Renewal of Marriage Vows sa magtiayon Florencio ug Virginia sa St. Mary of the Perpetual Rosary Parish ubos sa pagbendisyon ni Rev. Fr. William Cajes.

Tungod niini mapasalamaton sila sa Ginoo sa maong grasya nga gihatag sa ila ug sa dakong kalipay sa mga anak ilang gipangandaman ang maong pagsaulog sa ika-50 ka tuig sa kaminyoon sa ilang ginikanan, kay dili tanang magtiayon mahatagan og kahigayonan nga moabut sa ika-50 ka tuig nga panag-uban isip magtiayon diin sa taas nga higayon makauban nila ang ilang mga anak ug mga apo.

Baliklantaw sa kinabuhi sa magtiayon: si Papa Florencio usa ka lumad nga Sugboanon ug si Mama Virginia usa ka Dabawenya. Bisan pa sa ilang kabatan-on dili babag ang pagsulod nila sa natad sa kaminyoon niadtong April 26, 1969 diin gigasahan sila og diez y seis (16) ka mga anak.

Ang pagtinabangay ug pagkamakugihon gi-atiman sa magtiayon ang ilang yuta sa Barangay Colosas, Marugaan, Paquibato District, Davao City diin didto sila nagpuyo aron alimahan ang maong mga produkto alang sa panginabuhian nila ug pagsustento sa mga pang adlaw-adlaw nga panginahanglan ug pag-eskwela sa mga kabataan. Nagmalampuson sa pag-eskwela ang tanan nilang mga anak nga tungod niini aduna silay maayong panginabuhian diin ang uban anaa sa gawas sa nasod nagtrabaho.

Tungod sa pagkamaayo ug pagkamahigugmaon sa ilang mga anak gipapuyo karon ang ilang mga ginikanan dinhi sa GKK San Roque, Emilia Homes, Cabantian, Davao City nga nahisakop sa Parokya sa St. Mary of the Perpetual Rosary. Malipayon si Papa Florencio ug Mama Virginia tungod kay matag semana adunay panagtapok ang ilang mga anak ug sila gigasahan og veinte y seis (26) ka mga apo.

Ang gasa sa pagkamaampoon, pagsalig sa Ginoo, gugma ug pagsinabtanay maoy hiyas sa magtiayon nganong nakalahutay sila og hataas nga tuig sa kaminyoon ug dakong pasalamat sa Ginoo nga sila niabot na sa pangidaron nga seisenta y nueve (69) si Papa Florencio ug si Mama Virginia sa edad nga seisenta y cinco (65).

Mao kini ang hagit sa mga kabatan-onan karon nga unta mamahimong sumbanan ang kinabuhi ni Papa Florencio ug Mama Virginia nga diin niabot sila niining kadugayon sa kaminyoon, ang malahutayong relasyon ug masinugtanon sa ilang panaad atubangan sa altar. Cheers to Papa Florencio and Mama Virginia at 50th wedding anniversary! (Arsenia Barimbao | SMPRP-GKK SoCCom)