OMPH Medical Mission 2019

Kumusta imong Medical Mission experience Ma’am Kath? Akong pangutana sa isa sa upat (4) ka mga volunteer nurses nga niuban sa grupo sa mga volunteers nga gikan sa akong gitrabahuan. “Okay lang ma’am nalate mi ug abot sa venue pero maayo na lang kay naa man nauna na sad mga doctors nga nag-atiman sa mga pasyente.” Nalate diay mo? Dugang nakong pangutana. “Yes ma’am nadugay ang mga doctors kay wala diay sila nainform murag nagkaproblema ta sa communication pero okay lang nakatabang pa gihapon mi. Dili man kaayo daghan sa amoa kay mas daghan ang sa dental nga mga patients.”

Salamat ma’am Kath ug sa uban pang mga volunteer nurses, doctors, pharmacists, dentist nga nigahin sa ilang panahon alang sa paghimo nga malampuson ang gipahigayon nga Medical Mission sa parokya sa Our Mother of Perpetual Help (OMPH) niadtong June 8, 2019 sa alas otso (8:00) sa buntag hangtod alas dose (12:00) sa udto diin nagkatapok ang expected nga Three Hundred (300) ka mga pasyente nga gilangkuban og tig One Hundred (100) ka inahan, anak ug dental patients. Ang kada GKK nipadala og listahan sa tulo (3) nila ka pasyente. Deadline sa listahan niadtong May 31, 2019.

Si Lucy Losbanez parish worker kauban ang iyang grupo sa panglawas uban sa approval sa parish priest o sa designated OIC maoy nagpahigayon sa maong kalihokan. Usa kini ka tubag sa hagit sa pagpangalagad ngadto sa atong mga igsoon nga kabus nga nag-agwanta lang sa sa ilang gipangbati sa lawas tungod kay walay budget.

Sa pipila na ka tuig aduna gayud kining maong kalihukan pasalamat usab sa mga grasyang nadawat sulod sa isa (1) ka tuig. Mas malipayon na ang pag-saulog sa ika-47 ka tuig nga kapistahan sa among patron tungod kay ang mga igsoon nga nagmasakiton naserbisyohan ug natagaan na man og tambal. Dili man daghan o limitado ra pero maayo na lang nga naay nasugdan. Pag-ampo sa grupo nga unta sa sunod nga tuig mas modaghan pa ang mga doctors ug nurses nga mo-commit aron mas daghan pa ang makabenepisyo.

Jesus our Divine Physician heals us. (Marieta V. Comighud | OMPH Bajada SoCCom)