Bata Kristianos ka na

Kabahin sa pagpangandam sa umaabot nga pagsaulog sa ika 50 ka tuig ang St. Joseph the Worker Parish ( May 1,2014) niining Oktobre, bulan sa Rosaryo , daghang gilatid nga mga kalihukan.

Ang makahuluganon kaayo mao ang pagtugot sa kura paroko nga mahitabo ang “ Bunyagan sa Katilingban” , sa dugay’ng panahon mao kini ang gihangyo sa kadaghanan ilabina panahon sa GKK Fiesta.

Ang mapinanggaong kasing-kasing ni Fr. Dionisio Tabiliran nagtinguha nga matagaan og pagtagad kadtong labing manginahanglan, matagaan og prebilihiyo kadtong mga ginikanan nga wala makasal tungod may impedemento,walay birth certificate ang bata ug labaw sa tanan ang pagtugot nga sila na ang mag-igo sa ilang donasyon sigon sa ilang kabubut-on agi’g halad-pasalamat sa Ginoo.

Mikabat kinig 630 ka mga bata ug hamtong nga nakadawat sa Sakramento sa Pagbunyag, gikan sa walo ka mga Zona sakop niini. Gikalipay kaayo sa usa ka Inahan nga taga GKK Birhin Milagrosa, Km 10,Sasa..Matud pa niya” bisan pa man wala mosuporta and akong bana , nabunyagan ra gyud dungan ang akong siyam ka mga anak, tungod sa rason nga walay ikagasto.

Matud pa ni Jenny Gelbolingo, taga-opisina, basin mao na kini ang susi nga mag-abli sa mga ginikanan niining mga bata nga bunyaganan nga mopaduol ngadto sa Simbahan. Sumala pa ni Madz Tito ang in-charge sa maong kalihukan , “ Samtang nagasaksi ako sa maong pagbunyag sa gatusan ka mga bata, gibati ko nga sa tinuod sa maong higayon si Kristo mikanaog gikan sa langit ug nakig-uban sa mga kabataan. Ug nagkanayon siya pag-ingon “ nakadawat ako og dakong grasya sa Dios , wala ko batia ang kakapoy bisan sa akong paghatag pre-baptism ngadto sa mga GKK. (Amie Desquitado)