OMPH PSL Nagbag-o

Pahulay una sa mga naandan nga mga buluhaton sa kinabuhi ug hatagan ang sarili nga makarelax para sa kabag-ohan sa kahiladman aron malig-on pa ang pagtoo.

Nag-Retreat ang mga 70 ka mga Pangulo sa Liturhiya (PSL) sa pito (7) ka sona nga sakop sa Our Mother of Perpetual Help (OMPH) Bajada didto sa St. Benedict Retreat House, Ulas, Davao City, May 25-26, 2019.

Pito (7) ka mga PSL sa GKK Sta. Cruz nga sila si Loreto Pilapil, Jude Migraso, Danilo Guibone, Peter Cabahug Jr., Jerry Lopez, ug Tito Opamin ang kompleto nga miapil sa maong retreat. Lahi-lahi sila ug mga panginabuhian pero naggahin gayud sila ug adlaw aron makatambong sa maong retreat.

Matod pa ni Brod Mario Cailing nagsugod ang ilang kalihukan pinaagi sa Orientation nga gihatag sa ilang speaker nga si Sr. Mary Blesilda Divino OSB. Human sa paniudto ug pahulay kadiyot, nagsugod ang session pinaagi sa pag-pundok kanila ngadto sa tag-upat (4) o taglima. Mikabat sila sa 14 ka grupo kansang pagpaambit nahimong output alang sa processing. Pagkagabii adunay kompisal.

Padayon ang ilang session pagka-ugma. Dili problema nga ma-late kay stay-in ang maong retreat. Gitapos ang retreat pinaagi sa Holy Mass sa alas onse (11:00) sa buntag uban ni Fr. Jomil Baring CSsR. Human sa paniudto nanguli sila sa ilang tagsa-tagsa ka pamilya.

Unsa man ang nakalahi sa retreat karong tuiga? Si Brod Edwin Pilapil, PSL Coordinator sa parokya, miingon, “basta gikan o gihatag sa Ginoo always the best gayud mao atong dawaton.”

Kada human sa retreat mas maabtik, mas malipayon ug mas klaro ang padulngan sa matag PSL, klaro ang tawag sa pagserbisyo sa katawhan nga kauban sa tagsa-tagsa nila nga mga GKK, sa parokya ug sa tanang tawo nga mahimamat sa paglabay sa panahon. Salamat sa mga GKK nga nagpadala kanila ug sa mga katawhan nga nihatag ug gasa financial aron makatambong sila sa retreat 2019. Salamat OMPH Parish ug usab sa parish worker PSL Incharge Lucy Losbanez. (Marieta V. Comighud | OMPH Bajada SocCom)