Summer Youth Leadership Camp 2019 sa Santiago Apostol Nagmalampuson

Niadtong Mayo 24-26,2019 (Biyernes hangtod Domingo) gipahigayon ang Summer Youth Leadership Camp nga adunay tema nga “I am a servant of the Lord. May it be done unto me according to your word” sa tanang mga Pangulo sa Batan-on (PSB) sa Santiago Apostol nga gipangunahan sa Kura-Paroko nga si Rev. Fr. Rolando O. Mandreza, DCD didto sa Pablo M. Piatos Sr. Integrated School nga gipanguluhan sa principal nga si Sir Jose J. Duller. Diin adunay 150 ka mga batan-ong lideres nga gipanguluhan usab ni Kimberly C. Cortidor (Parish Youth Apostolate) inubanan sa mga aktibong miyembro sa Singles for Christ Bunawan Unit nga misalmot sa maong aktibidad.

Ang maong aktibidad gisugdan sa Santos nga Misa nga gipanguluhan ni Rev. Fr. Rolando O. Mandreza, DCD. Sulod sa maong misa, mipadayag ang kura-paroko sa tanang mga batan-on nga tumanon ang sugo sa atong Ginoo nga mao ang “Paghigugmaay kamo sama sa paghigugma ni Kristo kanatong tanan”. Walay mas dakong gugma gawas sa paghigugma sa ubang tao. Giawhag usab ni padre ang mga batan-on nga magpartisipar sa mga aktibidad sama sa gipahigayon nga youth camp aron mas makakat-on ug mulambo isip mga lideres sa matag Gagmay’ng Kristohanong Katilingban (GKK).

Sa tulo ka adlaw nga gipahigayong youth camp, adunay tulo ka Plenary Talks nga mao ang “I am”, “Servant of the Lord”, ug “Fiat”. Sa unang Talk nga mao ang “I am”, nga gihatag ni Sir Karlo Buenavenista, gipahinumduman ang tanang mga kabatan-onan nga isip mga binuhat sa Ginoo, kita ang templo sa Balaang Espiritu Santo ug giawhag sa speaker nga Mag-ampo, Mupahulay, ug Musimba gayud matag Domingo. Dugang pa niini, gihatag ni Bro. Michaelangelo Nisnisan ang ikaduha ug ikatulong talks diin iyang giawhag ang mga partisipante nga muserbisyo sa Ginoo ug mahimong andam sa pagpatay sa kaugalingong gusto aron matuman ang kabubut-on sa Ginoo. Ang maong mga pamalandong nakatabang gayud sa mga Pangulo sa Batan-on nga mamahimong madasigon sa ilahang pagkalideres sa tagsa-tagsa ka komunidad.

Sa katapusan, gitapos kini sa Santos nga Misa nga gipanguluhan sa Kura-Paroko nga si Rev. Fr. Rolando O. Mandreza, DCD diin siya miingon, “Kung knsa ang mudawat kang Jesus kay makadawat ug tinun-ay kalinaw, nga bisan unsay suliran o problema, dili mabalaka kay tungod maga-uban si Jesus sa atoa”. Dili mabalaka kay naay musulbad niining tanan. Ang importante mabuhat nato ang kabubut-on sa Ginoo. Sama sa atong Mahal nga si Birheng Maria nga nisubay sa sugo sa Ginoo, dugang pa nya. Giawhag usab ni padre ang mag batan-on nga musubay sa kabubut-kn sa Ginoo ug ipaambit sa uban ang kalinaw ni Kristo. Dako gayud ang pasalamat sa atong Kura-Paroko sa mga taong nagpaluyo sa maong aktibidad kay kini maginungdanon ug nagmalampuson. (An-Jean V. Naraga | SJAP Bunawan SoCCom)