Kapistahan ni San Isidro Labrador gisaulog

“San Isidro Labrador sumbanan sa pagka-mainampoon ug panig-ingnan sa Kabatan-onan sa panaw sa pakighimamat sa Ginoo.” Mao kini ang tema sa pagsaulog sa ika-23 ka tuig nga kapistahan ni San Isidro Labrador sa GKK San Isidro Labrador, Ciudad de Esperanza nga nahisakop sa Parokya sa St. Mary of the Perpetual Rosary Parish, Buhangin, Davao City.

Gipahigayon ang Santos nga Misa niadtong Mayo 24, 2019 sa alas otso sa buntag. Ang Santos nga Misa gipangulohan ni Rev. Fr. Rey Sabuero, ang parochial vicar sa St. Mary of the Perpetual Rosary Parish ug gi-abagan ni Rev. Fr. Jess Samaniego, kura paroko sa Our Lady of Miraculous Medal Parish sa Indangan.

Nagsugod niadtong Mayo 15, 2019 ang Novena Mass sa alas sais ang takna sa gabii ug nagpadayon kini hangtud sa ika-siyam ka gabii nga gipangulohan sa mga Pangulo sa Liturhiya (PSL).

Tungod kay tuig man karon sa mga kabatan-onan adunay input nga gipaambit sa mga parish formators nga sila Arnaldo Villodres ug Jo Paningbatan. Kini dugang pagpasabot sa mga kabatan-onan kung unsa sila ka importante isip Filipino youth in mission: Beloved, Gifted and Empowered.

Makahuluganon ug malipayon nga gisaulog sa mga GKK Servant Leaders (GSL) ug mga miyembro sa katilingban ang kapistahan ni San isidro Labrador tungod sa mga nagkadaiyang kalihukan nga nakalatid aron masinati ang kahiusahan sa matag miembro sa katilingban.

Ang pag-procession sa imahen sa Patron gihimo palibot sa subdivision niadtong bisperas sa kapistahan, Mayo 23, 2019 sa alas sais ang takna sa gabii. Human sa Santos nga Misa madasigon nga nagpartisipar ang mga miembro sa katilingban sa mga aktibidades sama sa Parlor Games sa mga kabatan-onan, Talent Night ug ang GKK inter-zonal Tawag ng Tanghalan singing contest diin gi-apilan kini sa mga GKK nga sakop sa Zone 3.

Dugang kalipay ang nasinati sa katilingban tungod sa Basketball Exhibition Game sa Davao Clergy Team ug Ciudad de Esperanza Team.

San Isidro Labrador, hamiling patron, usa ka mag-uuma, maampoon ug manggihatagon. Mao kini ang hagit sa mga GSL ug miembro sa katilingban kung unsaon kini nga mahatagan og bili ang mga gawi ni San Isidro Labrador. Ang mga gasa dinhi sa yuta, mga gasa sa kinaiyahan nga gikinahanglang alimahan. Viva San Isidro Labrador! (Arsenia Barimbao | SMPRP-GKK SoCCom)