Gasa mo ipaambit mo

“Sa pagkatinuod, magaingon ako kaninyo, nga maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat usab ninyo kini kanako” (Mateo 25:40). Kining maong mga pulong ni Jesus magapukaw kanatong tanan, diha sa pag-inunungay ug pagtinabangay sa matag usa, ilabina sa mga nanginahanglan natong mga kaigsoonan.

Niadtong Mayo 27, 2019, adunay gipahigayon nga outreach program didto sa Barangay Suwawan, Marilog District, Davao City. Gipahigayon ang maong kalihokan sa bungtod diin nahimotang ang kapilya sa GKK sa Nuestra Señora Salvacion, nga nahisakop sa San Isidro Labrador Parish, Lumondao. Adunay mga 60 kapin nga mga kabataan nga mga nakadawat og mga school supplies, first aid kit, mga school bags ug uban pa. Dugang grasya sa Dios ang among pagbisita kay natunong sa skedyol sa kulminasyon sa Flores de Mayo sa maong GKK. Ang pahiyom ug kalipay sa mga kabataan dili kabayran. Sila mapasalamaton sa mga mipaambit sa mga gasa nga ilang nadawat.

Bag-o napahigayon ang gift giving, miagi kini sa masusi nga pagplano, nga gipangulohan ni Kristelle Billones, nga taga Immaculate Conception Parish Mintal ug kining writer, Editho John Tomales, nga miyembro sa GKK sa Our Lady of Fatima Royal Valley, usa sa mga GKK sa Our Lady of Lourdes Parish sa Bangkal, inubanan sa mga kabatan-onan sa nagkalain-laing parokya sa Archdiocese sa Davao. Sa panahon sa pagplano, gipresenta sa akoa, (Editho John Tomales) ni Maam Ana Norbe ang Pastoral Coordinator ug Head Catechist sa Our Lady of Lourdes Parish nga kung puwede sa ilahang lugar pagabuhaton ang pagpanghatag og school supplies kay nakahibalo siya (Ana Norbe) kung unsa kalisod ang kahimtang sa iyang yutang natawhan, sa Barangay Suwawan.

Tuod man, pinaagi sa Social Media (Facebook) nagmalampuson ang maong proyekto. Nakakita og mga manggihatagong mga tao nga andam mopaambit sa ilahang mga gasa. Grasya sa Dios ang tanang mga bata nga mitambong. Mi-uli sa ilang tagsa-tagsa ka mga panimalay nga puno sa kalipay ug paglaum ilabina sa ilang pagpangandam sa balik-eskwela karong Hunyo 3.

Sa tanang mipaambit sa ilahang mga gasa daghang salamat. Dili nato kalimtan nga kita mga piniyalan sa atong Ginoo. Kita gigasahan ug kining pagkaginasahan, mas magmalamboon ug kini atong ipaambit ngadto sa uban. Kitang tanan adunay kaakuhan sa matag usa ug ilabina diha sa mga nanginahanglan. Kining tanan iya sa Ginoo ug alang lamang sa Ginoo. Dalaygon ang Diyos! (Seminarian Editho John Tomales)