Bag-oha kami Espiritu Santo!

Pentecost Sunday
Acts 2:1-11 / Ps 104:1, 24, 29-30, 31, 34 / 1 Cor 12:3-7, 12-13 or Rom 8:8-17 / Jn 20:19-23 or Jn 14:15-16, 23-26

Si Andresa, usa ka minyo nga babaye nga adunay tulo ka anak. Matag buntag sayo, mga alas kuwatro pa moadto siya sa ilang Simbahan sa lungsod aron sa pagpanglimpyo. Gitugutan siya sa ilang pari sa pagbuhat niini, human nga gisaysayan niya ang pari sa iyang saad sa Dios. Iyang silhigan ang tibuok wanang sa simbahan, manarapo sa mga lingkoranan ug mga muebles hasta ang kumpisalan. Human sa usa ka oras mobalik siya sa balay aron sa pag-andam sa pamahaw alang sa pamilya ug pag-andam sa mga galamiton ilabina sa mga nag-eskwela niyang mga anak. Sa dili pa ang alas sais mobalik siya aron sa pagsimba. Ang pangutana: Unsay nagtulod kaniya sa pagbuhat niining tanan? Matod pa niya, kining iyang pag-alagad sa simbahan, nagsugod sa usa ka kasinatian diin ang iyang kamagulangang anak nagkasakit ug hapit na gayud mamatay. Sa diha nga gidungog sa Dios ang iyang pag-ampo, misaad siya nga ihalad niya ang iyang kaugalingon sa pag-alagad, nga walay pagpaabot ug ganti. Kini iyang gibuhat tungod kay nagpasalamat siya sa kaayo sa Dios ngadto kaniya ug sa iyang pamilya. Ang pangutana: Unsay nagtulod kaniya sa pagpadayon niining iyang pag-alagad? Ang atong ebanghelyo karong adlawa, naghisgot mahitungod sa Espiritu Santo. Sa Daang Testamento, ang Espiritu Santo gilarawan isip aktibong gahom diin ang Dios sa iyang kaugalingon, aktibo diha sa sulod sa mga tawo, sa uniberso, sa kasaysayan, ug sa kabuhatan. Karon adlawa pinaagi sa Espiritu Santo, ang Dios misulod sa atong kasingkasing. Nagpuyo siya sulod kanato. Pinaagi sa iyang gahom, ang atong mga sala mapasaylo diha sa mga sakramento. Gihatag kini kanato sa atong bunyag ug gipakusgan diha sa Kompirmasyon. Ang Espiritu Santo, motabang kanato sa pagtuman sa kabubut-on sa Dios, ug maghimo kanatong tanan nga mga balaan o santo. Ang Espiritu Santo talagsaon nga matang sa gahom, kay sa atong ordinaryong pagsabot nga paglarawan nga usa ka gahom isip puwersa, ug biolente, sama sa dagkong mga bukton, nuclear nga bomba, o linog ba hinoon. Tinuod mga kusog kini apan nagagikan sa gawas nga samag pagtulod, pagdaut, pagpapahawa.

Ang gahom sa Espiritu wala magagikan sa gawas kondili anaa sa sulod. Sa hinay o malumanay nga paagi, mohatag siyag kainit, mogiya sa matag usa kanato sa pagbuhat sa unsay husto ug maayo. Mosulod siya sa atong kasingkasing, mosugyot, mohagawhaw ug mopalihok kanato sa unsa ang kabubut-on sa Dios. Mao kana ang nagtulod kang Andresa sa iyang pagpasalamat ug pag-alagad sa Dios nga walay hunong o gipaabot nga ganti.

Niining atong kalibutan karon nga puno sa kasaba ug mga pagsulay, giawhag kita sa atong pagtuo nga motawag kanunay sa Espiritu Santo, aron mapuno ang atong kasingkasing sa iyang langitnong gahom. Dali Espiritu Santo, dali nganhi kanamo karon dayon! Amen. (Sr. Rica G. Dalaguit, fsp)