Mga ginikanan sa mga nag-Flores de Mayo mitambong sa Kasaulogan sa Pulong

Mga ginikanan sa mga batang nagatambong sa Flores de Mayo (FDM) sa kapilya sa GKK Sta. Cruz, sa Parokya sa Mother of Perpetual Help, Bajada, nanambong sa Kasaulogan sa Pulong niadtong Sabado May 18, 2019. Makalipay nga nidaghan mi nga nagsaulog niadtong gabhiona.

Human sa Kasaulogan nag-meeting sila kauban ang among Pangulo sa Panudlo nga si Lorna Diego ug katekista nga si Virgie Tampipi aron sa unang higayon makonsulta ang mga ginikanan bahin sa petsa sa culmination sa Flores de Mayo 2019. Nauyonan nga himuon kini sa Mayo 29, 2019 sa alas singko (5:00) sa hapon pero ang mga bata sa buntag pa lang anaa na sila.

Adunay “modified Santakrusan” nga pagahimoon. Dili man sila mag-gown sama sa naandan. Magsuot lamang sila sa ilang mga puti nga sinina ug “sash”. Pabunoton ang mga bata sa ilang irepresentar nga mga personalidad sama ni Reyna Elena. Dili na pod sila kinahanglang mobaktas palibot sa village apan diha ra sila mopaso sulod sa kapilya alang sa safety sa tanan.

Nagkasabot pod nga mag-amot og One Hundred Pesos (P100.00) alang sa mga souvenirs nga ihatag sa mga bata ug sa mga special awards ug recognition. Bring your own baon lamang alang sa pagkaon. Gipahinumdoman pod sila nga magdala og extra para sa mga bisita.

Sa kapin semana na lang nga pagpangandam ug dugang nga pagtuon bahin sa “Flores de Mayo” excited ang tanan tungod kay sa tuig 2018 bibo man ang culmination. Gipanghinaut nga bibo usab karon tungod sa modified santakrusan ug sa special numbers gikan sa mga bata ug sa mga ginikanan.

Kauban sa mga katekista ang mga Youth usab namo nga maoy mitabang pagpasayon sa mga kalihukan, sa pagbantay sa mga gagmay’ng bata, sa pag one-on-one coach nila aron makamemorize ug makahibalo na sa pagrosaryo. Usa ka semana nga late nakasugod sa Flores tungod kay aduna pa may Novena sa pista niadtong May 5 mao ang personal coaching dako ug ikatabang para makaapas pa sa leksyon.

Panghinaut usab sa mga GSL nga magpadayon ang presensiya sa mga ginikanan aning mga bataa sa pagtambong sa among Kasaulogan sa Pulong kauban ang ilang mga anak aron sayo pa maanaa na kanila ang gugma sa pagserbisyo alang sa katawhan ug labaw sa nga tanan sa atong Ginoo.

Nalipay ang mga GKK Servant Leaders kay nagpakita gayud sila og interes sa maong kalihukan. (Marieta V. Comighud | OMPH Bajada SoCCom)