Magtiayon nahimong mananaug isip gobernador sa managlahing probinsiya

Nahimong kulba hinam ang piniliay sa Probinsya sa Maguindanao tungod sa parehong apelyido ang midagan sa pagka-gobernador kinsa pulos mga Mangudadatu, mao sila si Bai Mariam Sangki Mangudadatu, outgoing Mayor sa lunsod sa Datu Abdula Sangki ug si Freddie Mangudadatu Mayor usab sa lunsod sa Mangudadatu.

Apan niadtong Mayo 13, 2019 nahimong gipitik sa dughan sa kadaghanan mao si Bai Mariam kinsa giila nga pinakauna nga Lady Governor-Elect sa 46 anyos na nga probinsya.

Atol sa piniliay nakuha ni Bai Mariam ang 253,338 ka boto samtang si Mayor Freddie Mangudadatu naka kuha sa 198,365 lamang ka boto sa 36 ka Munisipalidad.

Busa sa maong puntos, way duha-duha nga gideklara siya sa mga opisyal sa Comelec nga umaabot nga gobernador sa probinsiya. Ang proklamasyon gihimo niadtong Mayo 16, 2019 sa Shariff Kabunsuan Complex sa Cotabato City.

Sumala sa mga pakighinabi sa mga tigbalita sa Incoming Lady Governor nga labing tagaan niya og dakong atensyon ang kalinaw sa ilang lugar, ingon man wala kini pili gikan sa Lumad, Kristiyano ug Muslim ilabina nga nagkahiusa na ang mga dagkong apelyido sa clan sa ilang lugar.

Samtang nahibaloan sa pagpanubay nga si Bai Mariam kapikas sa Governor-Elect usab sa Probinsya sa Sultan Kudarat nga mao si Governor-Elect Suharto Mangudadatu.