Personal nga relasyon atong misyon

Pagsaka sa Langit sa Ginoo
Acts 1:1-11 / Ps 47:2-3, 6-7, 8-9 / Eph 1:17-23 or Heb 9:24-28; 10:19-23 / Luke 24:46-53

Matag saulog nato sa pagsaka sa langit sa Ginoo, ang tibuok Simbahan nagsaulog usab sa Adlaw sa Katilingbanong Komunikasyon sa tibuok kalibutan. Karong tuiga mao ang ika-53 nga tuig niining maong kasaulogan uban sa tema “Kitang tanan bahin man sa lawas ni Kristo (Epheso 4:25). Gikan sa katilingban sa social network ngadto sa katilingban nga tawhanon.”

Si Santo Papa Francisco nagduso sa iyang mensahe nga ang mga hitsas sa komunikasyon karon, sama sa radyo, mantalaan, telebisyon, ug ilabina ang internet, maghimo unta kanatong tinuod nga mga tawo nga makiglambigit sa usa’g usa. Ang paggamit niining maong mga kahimanan karon maghatod unta kanato sa tininuod nga pagbati sa usa’g usa ug dili ang pagtakuban. Personal nga relasyon maoy makalig-on sa atong pagbati sa usa’g usa diin kita morespeto ug molantaw uban sa dakung pagtahod sa kabililhon sa isigkatawo.

Mao man gani nga sa unang pagbasa, personal gayod nga nagsulat si Lukas ngadto kang Teofilo. Iya usab nga gisaysay ang personal nga pagpili ug pagpakig-uban ni Kristo sa iyang mga tinun-an. Sa ikaduhang pagbasa, tinuod usab nga personal gayod nga mianhi ang Ginoo diha aron sa pagpadayag sa iyang dakong gugma kanato. Kini iyang gihimo sa pagpakatawo ni Kristo, sa iyang ministriya, pagpasakit ug pagkabanhaw. Ang Dios mismo diha kang Kristo nag-antus alang kanato sa krus. Dili na lain ang gihalad kondili ang iyang kaugalingon mismo alanag kanato. Kini usab ang gihisgutan diha sa Ebanghelyo diin ang Mesiyas nagpasakit ug nabanhaw aron kita mapasaylo. Samatang mibiya siya sa iyang mga tinun-an, napanalanginan sila ug napuno sa kalipay. Nagdayeg ug nagsimba sila sa Ginoo.

Manghinaut kita mga igsuon, niining Kalibotanong Adlaw sa Katilingbanong Komunikasyon nga molambo unta kita sa pagbansay sa atong pagbati sa usa’g usa, diin motagad kita nga puno sa pagmahal ug pagsabot isip tawo. Sa atong paggamit sa mantalaan, radyo, telebisyon ug internet, matuman unta nato ang misyon sa pagkahiusa, pagtinabangay, pagdawatay ug dili ang pagdautay, pagsaway, pagpamintaha ug panlimbong. Ang personal nga misyon atong tanang misyon.