Ang nahigugma masinugtanon

Ika-unom nga Domingo sa Pagkabanhaw
Acts 15:1-2, 22-29 / Ps 67:2-3, 6, 8 / Rv 21:10-14, 22-23 / Jn 14:23-29

Usahay magyawyaw ang ginikanan nga ilang mga bata karon gahig ulo, dili motuman sa sugo. Usahay magbagulbol ang asawa batok sa bana kay kuno wala na mahigugma kaniya kay dili na patoo sa tambag nga undangnon ang bisyo. Usahay moreklamo ang bana batok sa asawa kay matud pa wala na nagmahal sa bana kay wala na man manumbaling sa kahago ug paningkamot kay dali raman mogasto sa sweldo ug kita.

Sa wala pa nagpasakit si Kristo, hayag ang mga pulong nga iyang gilitok kay matud pa niya, ang nahigugma kaniya magtuman sa iyang mga sugo. Misalig sa Hesus nga ang nagmahal kaniya, mosunod sa iyang gisulti. Ang nakabig sa iyang pagpangga dili magpanuko sa pagbuhat sa iyang gusto.

Kini iyang nasulti tungod kay mao man usab kini ang iyang nasinati sa iyang gugma sa Amahan. Bisan sa malisud nga misyon, wala moatras si Hesus. Bisan sa kalisud sap pag-antus ug kapiligro sa kamatayon wala mobalibad si Hesus sa kabubut-on sa Amahan. Kini tungod kay hilabihan ang iyang gugma sa Amahan sayod usab siya nga siya gihigugma pag-ayo sa Amahan. Walay makababag kaniya sa pagbuhata sa angay kung kini subay sa kabubot-on sa Amahan. Andam siyang himuon ang tanan tungod ug alang sa iyang gugma sa Dios Amahan ug kanatong iyang katawhan.

Mao usab kini ang nagtukmod sa mga apostoles diha sa unang pagbasa, ang dili paghatag kabug-at sa mga sumusunod ni Kristo tungod sa gugma. Alang kanila, ang gugma makapagaan sa bisan unsang ipapas-an sa hinigugma. Aduna gayoy kahayag uban kang Kristo sama sa nasaksihan ni Juan sa ikaduhang pagbasa. Walay kangitngit ug kabug-at kung adunay gugma.

Isip asawa o bana nga nahigugma, kalipay nimo ang pagsunod sa unsay ikalipay sa imong asawa o bana. Isisp anak nga nagpuyo palibot sa gugma, gaan ang pagtuman sa unsay tambag o hangyo sa mga ginikanan. Isip trabahante, sayon buhaton ang sugo sa labaw kung ang pagmahal sa trabaho anaa. Busa puy-an ta ang tinuod nga gugma aron magmalinawon kita.