Flores de Mayo gilunsad sa Malabog

Kabataan sa mga GKK mitambong sa selebrasyon alang kay Maria

Gatusan ka mga kabataan gikan sa nagkadaiyang GKK ug mga katekista sa paglunsad sa Flores de Mayo sa San Roque Parish sa Malabog.

Didto sa parokya nga nahimutang sa Paquibato District sa syudad, nakita nga milugsong ang mga bata gikan sa lagyong mga GKK aron mutambong sa maong paglunsad niadtong Mayo 5, sa alas 8:30 sa buntag.

Mikabat kini sa 56 GKKs o 12 ka sona ang gilangkoban sa parokya sa Malabog. Kada GKK nagadala og tiglima ka mga bata para dili dako ang pamasahe sa pag-adto sa simbahan gawas lamang sa duol nga GKK sama sa sona 10 diin tanang mga bata sa sakop sa GKK gipatambong sa mga katekista.

Nagdala sila og mga bulak ug mga abot sa kaumahan ang mga bata ug katekista aron ihalad sa simbahan ug Mama Mary.

Diha sa homiliya sa kura paroko na si Fr. Arnold Balaquinto, nagpahimangno siya sa mga katekista nga tudloan ang mga bata sa paghigugma labi na sa Santos nga Rosaryo ug sa pagpaapil sa Flores de Mayo diin pasabton sila unsa ang kahulugan sa paghigugma labi na sa pagrosaryo.

Human sa misa gipakaon dayon og arroz caldo ang mga bata nga giandam sa mga staff sa simbahan ug paniudto sa mga katekista. Gimeeting pod dayon ni Fr. Arnold ang mga katekista sa mga schedule sa culmination ug mga kalihokan niini.

Sumala pa ni Sis. Maria Sabate taga sona 11 nga mapasalamaton siya kay nakadala pod siyag mga bata sa ilang GKK ug nakakaon pod og lugaw nga lamian kaayo. Mag-andam pod siya sa mga kalihokan sa GKK labi na sa pagtudlo sa mga bata.

Mipaabot ang PSP Parish Coordinator nga si Jeanifer Esurez sa iyang pasalamat sa mga mitambong ug mihatag og panahon alang sa bulan nga gisaulog alang kang Birhen Maria. (Imelda C. Overiz | SRP Malabog SoCCom)