Kasabutan sa kalinaw alang sa barangay level

Usa ka adlaw una mahitabo ang barangay elections, ang St. Francis Xavier Parish sa Tibungco nagpahigayon og covenant signing alang sa mga kandidato.

Tungod sa mga pipila ka mga report mahitungod sa panagbingkil ug kagubot nga nahitabo panahon sa pagpangampanya, gipatawag sa kura paroko sa St. Francis Xavier Parish nga si Fr. Ben Capulong ang 102 ka kandidato gikan sa tulo ka barangay nga sakop sa parokya aron mutambong sa alas 7 nga misa sa parokya ug manumpa atubangan sa katawhan.

Kini ang upat sa gipanumpa sa mga kandidato sa Barangay Tibungco, Barangay Ilang ug Barangay Mudiang atubangan sa katawhan sulod sa misa niadtong Oktubre 27:

1. Dili namo buhaton ang paghadlok o panghuraw sa mga botante;
2. Dili namo buhaton ang pagpamalit ug mga boto;
3. Dili namo buhaton ang pagsabotahe sa nagkalain-laing pamaagi nga maoy makaguba sa demokratikanhong pagpili sa mga kandidato nga buot pili-on sa mga katawhan;
4. Among respetohan ang modaug nga mga kandidato human maproklamar sa Commission on Election.

Gipahimangnoan usab ni Fr. Capulong ang mga GKK leaders nga midagan sa barangay elections mahitungod sa ilang gihimo panahon sa pagpangampanya ilabi na kung gigamit nila ang ilang impluwensya ug posisyon sa GKK aron makakuha og boto sa katawhan, nga dili na sila pwede mubalik sa ilang posisyon sa GKK kung dili sila palaron sa piniliay.

“Mitoo kami nga ang piniliay lumalabay lamang apan ang among pagka-silingan, paryente, suod nga higala, magpadayon hangtud nga aduna pa kami kinabuhi,” kini sumala sa ilang kasabutan nga gisulti sa atubangan sa katawhan.

Mi-lagda usab ang mga kandidato sa ilang pangalan ubos sa kasabutan nga ilang gibasa panahon sa misa.
Gipanalanginan usab ni Fr. Capulong ang tanang kandidato pinaagi sa holy water ug insenso.
Sa pagpaambit sa kalinaw sulod sa Misa, gi-awhag ni Fr. Capulong nga duolon sa mga kandidato ang usa’g usa aron ipakita ang ilang tinooray nga pagpaambit sa kalinaw pinaagi sa pag-lamano ug pagpahiyom sa usa’g usa.

Bisan dili kumpleto ang 102 ka mga kandidato nga mitambong sa misa, gikalipay sa kura paroko nga napahitabo ang maong covenant-signing alang sa kasayuran sa mga parokyano ug aron mapabilin ang kalinaw sa tibuok parokya.