Peñaplata Parish gikalipay ang Kasalan sa Parokya

Mabulokong gisaulog sa mga parokyano sa Immaculada Concepcion Parish sa Island Garden City of Samal ang “Kasalan sa Parokya” niadtong Abril 13, 2019 diin ang 192 ka pares malipayong midawat sa sakramento sa kasal.

Ang Kasalan sa Parokya nahimong posible tungod sa gipahigayon nga Festival of Services sa probinsya sa Davao del Norte diin ilang gisuportahan ang pangandoy sa mga parokyano nga makadawat sa sakramento sa kasal. Agig suporta sa maong parokya nga gipangulohan ni Rev. Fr. Rommel Banilad, gihimong libre sa probinsya sa Davao del Norte ang mga brides maid’s white dress, belo, chord, singsing, mga white polo shirt alang sa mga kalalakinhan, ug bisan man ang cake ug ang mga give-aways.

Dili usab mahimong posible kining tanan kung dili tungod sa pag-organisa nga gihimo sa maong kura paroko sa simbahan nga si Rev. Fr. Rommel Banilad ug sa iyang Assistant nga si Rev. Fr. Hernando B. Milan. Kauban sa pag-organisa niini ang ministriya sa Pangulo sa Katilingbanong Banay o PSKB nga gipangulohan nila ni Bro. Chris Lano ug Sis. Reyza Lano ug sa tanan nilang kauabanan sa ministriya.

Mipadangat usab sa ilang suporta ang apostolado sa Family Life nga maoy mihatag sa pormasyong mansibado nga gipangulohan ni Sis. Eva Palconit ug sa iyang mga kaubanan nga sila si Sis. Artemia Bedico, Sis. Perla Soria, Bro. Guillermo Olden, Bro. and Sis. Alfredo Ambrona, Sis Josephine Apale. Nilambigit usab ang ministriya sa Pangulo sa Batan-on o PSB, Knights of Columbus ug uban pang ministriya sa simbahan.

Dili matago sa mga mata ni Mary Grace Yares Galleñero nga usa ka kinasal nga taga Brgy. Anonang sa dihang gipangutana sa iyang gibati: “Lipay gyud kaayo kay nakasal na mi, sulod sa 7 ka tuig namo’g inipon. Nalipay gyud.”

Kining selebrasyon nga nahitabo sa parokya sa Immaculada Concepcion gi-isip nga dakong grasya nga miabot diha sa matag usa nga boot mangatubang sa Ginoong Diyos ug modawat sa sakramento sa kasal kauban ang ilang pinili nga hinigugma ug maka uban sa katapusan sa ilang kinabuhi. (Honey Rose H. Abrigo | ICP Peñaplata SoCCom)