GKK Sta. Cruz nagsaulog sa ika-26th nga Fiesta

Alas otso (8:00) sa buntag May 4, 2019 mao ang Fiesta Mass alang sa ika beinte sais (26) nga kapistahan sa GKK Sta. Cruz sa NHA Buhangin, sakop sa Our Mother of Perpetual Help Parish Bajada. Sayo pa nga niabot ang among parish workers nga si Sharon ug Babino kauban si Fr. Arnel. Naghinay-hinay usab ug pangabot ang mga sakop sa GKK hangtud napuno ang among chapel ug nakasugod gyud sa alas otso.

Highlights karong pistaha ang induction of 2019 Youth officers. Kani sila gilauman nga mamahimong aktibo sa mga kalihokan sa kapilya man o sa simbahan apil na sad niini ang pag-assist sa mga katekista panahon sa Flores de Mayo nga sugdan karong semanaha.

Sa pipila na ka tuig nga mga kasaulugan sa among Fiesta kanunay na namo’ng madungog ang comment nga matingala ang pari ngano nga Mayo ang among fiesta tungod kay sa ilang nahibaw-an September man gyud ang fiesta sa Sta. Cruz. Karong tuiga nakaconclude si Fr. Arnel nga siguro taga Bohol ang nagpasiugda sa among kapistahan, nangatawa mi kay tinood man nga among PSK taga Bohol pero kani nga petsa sa among fiesta giagi ni ug pagpili sa mga namuyo diri sa NHA daghan ang gipilian pero ang Sta. Cruz ang nidaog. Siguro niadtong higayona wala pa gyud siguro nakahibalo sa tinood nga petsa sa Sta. Cruz basta kay nauyunan nga movable date – Every 1st Sunday of May.

Pero sa tinood lang mao ni ang challenge nga dapat atubangon sa mga GKK Servant Leaders tungod kay kinahanglan nga itama na ang mali nga naandan pero tungod kay karong tuiga aduna man usab change of assignment ug leadership sa parokya wala sa kini atimana kay lisod baya utrohon ang naandan na. Kung kinsa man ang mapiling mga bag-ong lideres aduna na silay issue nga unahon og sulbad.

Karong 2019 nga pagpangandam sa among kapistahan adunay mga lahi nga experience mi. Ang presensiya sa mga youth sa among novena ug kasaulogan dili man unta problema kay kasagaran ani nga panahona daghan na ang mga bata ug batan-on nga motambong kay wala na baya’y klase pero sa unang adlaw sa novena naproblema na mi sa presensiya sa mga youth kay wala sila unya kinahanglan baya gayud sila tungod kay ang mga inputs sa mga formation team nga gipadala sa parokya nakasentro sa mga youth kay “Year of the Youth” man ang 2019. Aduna pa sila’y pag-ampo alang sa mga batan-on.

Karon pung tuiga medyo conscious ang mga naglihok tungod kay adunay upat (4) ka mga GKK nga kauban sa sona nga nakaschedule nga mo-sponsor sa Kasaulogan. Kauban usab nila ang ilang mga miyembro. Morag adunay performance tests sa kada sponsor nga GKK morag nabag-ohan mi pero sa tinood lang maayo siya nga experience kay makakat-on ka gikan nila ug maka-evaluate pud ka sa mga kakulangan nimo ug sa unsa pud ang imong dapat himoon aron mamaayo usab ikaw sa imong assignment. Mas maayo pud kini og impact ngadto sa mga batan-on kay mas nagkakita-kita sila ug siguro nakashare pud og mga dapat himoon.

Sa panahon sa Novena ug KSP nga nagsugod sa April 25, 2019 daghan pud ka og mahibaloan bahin sa mga batan-on tungud kay nabahin ang mga inputs sa mga mosunod “1. Pasiuna sa tuig sa kabatan-onan/kahulogan sa logo, 2. Kinsa ang mga kabatan-onan karon?, 3. Gihigugma nga mga kabatan-onan, 4. Gigasahan nga mga kabatan-onan, 5. Gigamhan nga mga kabatan-onan, 6. Ayaw kahadlok!, 7. Maria! (Gitawag ko ikaw sa imong ngalan), 8. Gikahimut-an ka sa Dios, 9. Kaisog sa pag-misyon diha sa atong panahon karon.”

Ang prosesyon ang pinaka-memorable ug pinaka-dapat dili na mausab nga experience tungod kay makahadlok makakita og dugo sa panahon sa prusisyon. Adunay kalahian karon sa pamaagi tungod kay imbes nga kargahon ang krus nga naa sa karo gibutang kini sa atop sa motorsiklo. Okay na unta to kung wala lang nasangit sa sanga ug nahagbong ang krus ug naa pa gyud naigo. Maayo na lang kay dili grabe ang pagkasamad ug labaw sa tanan wala kini nakahimong babag sa natungdan nga ipadayon ang pagtambong sa ika-siyam ka gabii sa novena ug mas labaw na ang sa misa pagka-ugma.

Aduna may gabii nga gamay ra gyud ang nakatambong tungod sa kusog kaayo nga ulan (nga pila pud ka bulan nga gihulat sa uban), aduna may nasamdan kay nahagbungan, namali man ug abri sa powerpoint sa entrance song, aduna may nakaahat ug salmo sa adlaw na sa misa tungod kay ang na-assign wala pa diha PERO sa tuig 2018-2019 dako kaayo ang among pasalamat sa Ginoo sa tanang mga gasa nga iyang gihatag kanamo, sa paglig-on niya namo panahon man sa kalipay o kasakit. Salamat Ginoo sa tanan. Viva Maria, Viva Hesus, Viva Sta.Cruz. (Marieta V. Comighud | OMPH SoCCom)