DADITAMA Catholic Charismatic nakapadasig

Mikabat sa kapin 300 ka mga delegado ang mitambong sa 1st DADITAMA Catholic Charismatic Congress nga gipahigayon sa St. Francis Xavier Regional Major Seminary of Mindanao, Catalunan Grande, Davao City niadtong Mayo 04-05, 2019.

Sumala ni Abi Domingo, Archdiocese of Davao Charismatic Coordinator, nga ang maong panagtapok gihimo aron usab magkahimamat ang mga sakop sa Charismatic aron sa pagpapalambo sa ilang aktibidad diha sa pagsangyaw ingon man pagserbisyo sa Labawngmakagagahom.

Samtang wala pakyasa sa pagtambong sa National Spiritual Director sa Catholic Charismatic nga si Rev. Fr. Bart Pastor nga mibiyahe pa gikan sa Diocese of Palo, butyag pa niini nga ang maong aktibidad usa ka pagpukaw sa mga naluya nga komunidad sa Charismatic.

Sumala pa nga dili ikalimod nga adunay mga bugnaw nga mga pundok busa pinaagi niini pukawon sa Balaang Espiritu ang matag komunidad aron mamahimong grasya diha sa simbahan.

Midugang sa pagbutyag si Fr. Pastor nga nahimong hinungdan sa nagkaluya nga komunidad sa Charismatic mao ang kakulang sa programa sa Pormasyon, ilabina diha sa pagtulun-an sa pagka-Kristiano, ingon man walay sistematiko nga pagtulon-an, anaa sumala pa ang Fellowship, Worship, apan kuwang sa Discipleship.

Sumala pa nga adunay mga nag-alagad sa simbahan nga kuwang sa pormasyon, ilabina nga angay nga aduna nay ginahimo nga pormasyon diha pa lamang daan sa parokya aron sa mamahimong aktibo ang tanan.

Aduna na sumala pa siyay mga lakang niini, ilabina ang pagsuwat sa Formation program.

“Importante ang pagtudlo sa Community. Need nga nay team nga silay bahala sa pagtulon-an sa simbahan ug pagpatubo sa Kristohanong Pamilya. Ingon ni Pope Francis ibalik ang kadasig sa tanan.”

Sumala pa nga sa tibuok kalibutan anaa sa 120 milyon ang Catholic Charismatic Community, ika-lima sumala pa ang nasud Pilipinas sa pinakadaghan.