Giunsa nato pagpadayag ang pagtahod sa Dios pinaagi sa atong ejemplo nga gibilin ngadto sa uban?

Ika-lima nga Domingo sa Pagkabanhaw
Acts 14:21-27 / Ps 145:8-9, 10-11, 12-13 / Rv 21:1-5 / Jn 13:31-33, 34-35

Ang Dios migamit sa makauulaw nga kasakit ug kamatayon ni Jesus isip dalan sa Diosnong kahimayaan. Ang gibuhat ni Jesus nga paghalad sa iyang kaugalingon pinaagi sa iyang kasakit ug kamatayon, mao ang pagpakita sa iyang dakung gugma ngadto sa Amahan ug sa katawhan. Sa diha nga gihalad ni Jesus ang iyang kaugalingon didto sa krus, gipadayag usab sa Amahan ang iyang mismong kaugalingon nga siya usa ka mahigugmaong Dios. Ang iyang mga mata nakapunting lamang kanato nga tawo. Ang Amahan nagpakita sa iyang gugma kanato pinaagi sa iyang Anak.

Ang Gugma mao ang paagi nga ang kamatayon didto sa krus mahatagan sa tukmang kahulugan diin, gikan sa pagka-kalibutanong panghitabo ngadto sa balaanong katumanan. Gipakita ni Jesus ang gugma sa Dios pinaagi sa iyang pagka mangihatagon sa kaugalingon.

Sa diha nga si Jesus wala na mahiuban sa iyang mga tinun-an, unsaon man pagpadayon pagpadayag sa himaya sa Dios? Mapadayag ang himaya sa Dios diha sa gugma taliwala sa mga tinun-an. Ang gugma mao ang makahimo paghiusa sa komunidad diin adunay usa ka panghunahuna ug kasingkasing; mao kini ang nakapahiusa sa katilingban ngadto sa Dios.

Ang gugma mao ang labing mahinungdanon pamaagi nga buluhaton sa tanang Kristiyano aron matudloan ang uban. Ang paagi sa atong pagpakig-relasyon, pagpakigsandurot kanila, nagpadayag og pilopiloan ka kahulugan sa atong pagtuo ug mao ang mo-agni kanila sa pag-apil sa atong Kristiyanong katilingban. Bisan gani sa ginagmay nga paagi sa gugma ato nang gidala ang maayong balita sa himaya sa Dios.

Adunay duha ka ministriya sa gugma ang atong Simbahan alang sa mga Kristiyano. Ang ministriya nga alang sa tanan, mao ang atong pag-alagad sa kalibutan. Ang specific nga ministriya mao ang pag-alagad sa mga sakop sa Simbahan sa ngalan sa persona ni Jesus sama pananglit sa mga Obispo, mga pari, mga deakono nga gitawag natong “Klerigo”. Ang tanang sakop sa Simbahan gitawag og “Laiko” (934-935).

Ang tanan gitawag sa sangon isip pari, kinsa giawhag kita sa pag-ampo; isip profeta, giawhag kita sa pagsaksi kang Jesus pinaagi sa pulong, ug buhat; Isip hari, gitawag kita sa pagka-lider kinsa modala sa uban sama sa gibuhat ni Jesus nga buhat sa mahigugmaong pag-alagad sa uban. Agig pagsumada: Ang tanang Kristiyano gitawag sa pagsaksi pinaagi sa ejemplo. Ang ejemplo sa pag-ampo, sa pulong ug sa buhat og pag-alagad sa uban.

Unsaon sa mga Kristiyanos nga nahigugma pagtabang kanimo kon anaa kamo sa mga pagsulay? Unsaon nila pagpakita sa ilang gugma?

Si Jesus mismo ang nahimong ejemplo sa Presensya sa Dios dinhi sa kalibutan. Diha sa buhat sa gugma, ang presensya sa Dios mabati. Mao usab kana ang atong ipadayon. Ang gugma ni Jesus mohatag kanato sa samang gugma nga atong ikapaambit sa uban. Mao kana nga gugma ang mohatag kanato sa tukmang kahulugan ug mo-agni kanato sa paghigugma. Kana nga gugma molatas sa atong mga pulong.

Palandonga ang mga pamaagi nga atong ikapakita ang gugma sa Dios ngadto sa uban. Pagplano ug duha o tulo ka buhat kon unsaon nato pagpakita og pagpaambit niining gugma karong semanha. (Sr. Rica G. Dalaguit, FsP)